is gali mein kuchh nahin bas ghaTta baDhta shor hai

is galī meñ kuchh nahīñ bas ghaTtā baḌhtā shor hai

ik makīñ kī ḳhāmushī hai ik makāñ kā shor hai

shām-e-shor-angez ye sab kyā hai be-hadd-o-hisāb

itnī āvāzeñ nahīñ duniyā meñ jitnā shor hai

ek mazmūñ hai par aapas meñ sabaq miltā nahīñ

apnī apnī ḳhāmushī hai apnā apnā shor hai

naql kartī hai mire chalte meñ vīrānī mirī

ye jo mere shor-e-pā se miltā-jultā shor hai

maiñ ye kyā yaktā-e-hangāma huuñ apne chār-sū

kyā akelī hā-o-hū hai kaisā tanhā shor hai

ḳhālī dil phir ḳhālī dil hai ḳhālī ghar kī bhī na pūchh

achchhe ḳhāse log haiñ aur achchhā-ḳhāsā shor hai

sāmne kī yaad juḌtī hai bahut pīchhe kahīñ

sab 'aqab se aa rahā hai aage jitnā shor hai

is gali mein kuchh nahin bas ghaTta baDhta shor hai

ek makin ki KHamushi hai ek makan ka shor hai

sham-e-shor-angez ye sab kya hai be-hadd-o-hisab

itni aawazen nahin duniya mein jitna shor hai

ek mazmun hai par aapas mein sabaq milta nahin

apni apni KHamushi hai apna apna shor hai

naql karti hai mere chalte mein virani meri

ye jo mere shor-e-pa se milta-julta shor hai

main ye kya yakta-e-hangama hun apne chaar-su

kya akeli ha-o-hu hai kaisa tanha shor hai

KHali dil phir KHali dil hai KHali ghar ki bhi na puchh

achchhe KHase log hain aur achchha-KHasa shor hai

samne ki yaad juDti hai bahut pichhe kahin

sab 'aqab se aa raha hai aage jitna shor hai