is ishq-e-junun-KHez mein kya kya nahin hota

is ishq-e-junūñ-ḳhez meñ kyā kyā nahīñ hotā

dīvāna hai jo qais se lailā nahīñ hotā

kuchh hashr lahad par abhī barpā nahīñ hotā

aa.e ho to Thahro koī zinda nahīñ hotā

kyuuñ kar ye kahūñ husn kā nashsha nahīñ hotā

hotā to bahut hai magar itnā nahīñ hotā

kuchh kahiye to sharmā ke jhukā lete haiñ gardan

bhūle se bhī ab vāda-e-fardā nahīñ hotā

milte haiñ vo dil surḳh huī jaatī hai chuTkī

nāzuk haiñ bahut ḳhūn-e-tamannā nahīñ hotā

detī hai mazā mai kā hameñ talḳhī-e-tauba

jab haath meñ paimāna-e-sahbā nahīñ hotā

vo hashr ke din kushte ko Thukrā chuke sau-bār

kuchh jaan sī paḌ jaatī hai zinda nahīñ hotā

bolī ye tamannā jo ruke vo dar-e-dil par

ghar aap kā hai aap se pardā nahīñ hotā

tīroñ ko jagah dete haiñ jo siine meñ apne

un logoñ ke ai jaan kaleja nahīñ hotā

sahrā se qadam ghar kī taraf ḳhaak uThā.ūñ

kāñTe se judā paañv kā chhālā nahīñ hotā

baiThe nazar aate haiñ vahī terī galī meñ

jin kā kahīñ duniyā meñ Thikānā nahīñ hotā

furqat meñ hai kyuuñ naza.a kī taklīf gavārā

mar jaa.eñ 'riyāz' aap se itnā nahīñ hotā

is ishq-e-junun-KHez mein kya kya nahin hota

diwana hai jo qais se laila nahin hota

kuchh hashr lahad par abhi barpa nahin hota

aae ho to Thahro koi zinda nahin hota

kyun kar ye kahun husn ka nashsha nahin hota

hota to bahut hai magar itna nahin hota

kuchh kahiye to sharma ke jhuka lete hain gardan

bhule se bhi ab wada-e-farda nahin hota

milte hain wo dil surKH hui jati hai chuTki

nazuk hain bahut KHun-e-tamanna nahin hota

deti hai maza mai ka hamein talKHi-e-tauba

jab hath mein paimana-e-sahba nahin hota

wo hashr ke din kushte ko Thukra chuke sau-bar

kuchh jaan si paD jati hai zinda nahin hota

boli ye tamanna jo ruke wo dar-e-dil par

ghar aap ka hai aap se parda nahin hota

tiron ko jagah dete hain jo sine mein apne

un logon ke ai jaan kaleja nahin hota

sahra se qadam ghar ki taraf KHak uThaun

kanTe se juda panw ka chhaala nahin hota

baiThe nazar aate hain wahi teri gali mein

jin ka kahin duniya mein Thikana nahin hota

furqat mein hai kyun naza ki taklif gawara

mar jaen 'riyaz' aap se itna nahin hota