is ishq ka anjam main kuchh soch raha hun

is ishq kā anjām maiñ kuchh soch rahā huuñ

haañ ai havas-e-ḳhām maiñ kuchh soch rahā huuñ

ḳhālī hue sab jaam nahīñ koī bhī mai-kash

ai durd-e-tah-e-jām maiñ kuchh soch rahā huuñ

jī bhar ke tujhe aaj maiñ dekhūñ ki na dekhūñ

ai husn-e-lab-e-bām maiñ kuchh soch rahā huuñ

apne dil-e-betāb se maiñ ḳhud huuñ pareshāñ

kyā duuñ unheñ ilzām maiñ kuchh soch rahā huuñ

mere liye mahbūb kī zulfoñ kī havā lā

ai gardish-e-ayyām maiñ kuchh soch rahā huuñ

taare se chamakne lage tārīk fazā meñ

hāthoñ meñ liye jaam maiñ kuchh soch rahā huuñ

ik vo bhī zamāna thā ki fāriġh thā maiñ 'sāqib'

ab to sahar-o-shām maiñ kuchh soch rahā huuñ

is ishq ka anjam main kuchh soch raha hun

han ai hawas-e-KHam main kuchh soch raha hun

KHali hue sab jam nahin koi bhi mai-kash

ai durd-e-tah-e-jam main kuchh soch raha hun

ji bhar ke tujhe aaj main dekhun ki na dekhun

ai husn-e-lab-e-baam main kuchh soch raha hun

apne dil-e-betab se main KHud hun pareshan

kya dun unhen ilzam main kuchh soch raha hun

mere liye mahbub ki zulfon ki hawa la

ai gardish-e-ayyam main kuchh soch raha hun

tare se chamakne lage tarik faza mein

hathon mein liye jam main kuchh soch raha hun

ek wo bhi zamana tha ki farigh tha main 'saqib'

ab to sahar-o-sham main kuchh soch raha hun