is jada-e-ushshaq ki taqdir ajab hai

is jāda-e-ushshāq kī taqdīr ajab hai

muTThī meñ jahāñ paañv meñ zanjīr ajab hai

be-vaq.at-o-kam-māya sahī ḳhvāb hamāre

ḳhvāboñ se alag hone kī ta.azīr ajab hai

maiñ sher kahūñ aur tire naam pe ro duuñ

ye rañj kā pairā-e-dil-gīr ajab hai

āñkhoñ meñ bichhe surma.ī maḳhmal kī adā aur

mahmil meñ phaTe hoñToñ kī tahqīr ajab hai

har iiñT mirī nazm ko detī hai dilāsā

ye kunj-e-ġhazal sahn-e-mazā miir ajab hai

dāġhoñ kī bahāroñ se mo.attar hai koī jism

aur ism paḌhe jaane meñ tāḳhīr ajab hai

ye ḳhāk-basar husn ye mahtāb kī Tahnī

roñdī huī sabze kī ye jāgīr ajab hai

nīlā.e hue sehnoñ kī bastī meñ hai kohrām

daryāfta sayyāre kī tasḳhīr ajab hai

dil sakte ke aalam se nikaltā nahīñ 'āmir'

ik baat ke sah jaane kī tāsīr ajab hai

is jada-e-ushshaq ki taqdir ajab hai

muTThi mein jahan panw mein zanjir ajab hai

be-waqat-o-kam-maya sahi KHwab hamare

KHwabon se alag hone ki tazir ajab hai

main sher kahun aur tere nam pe ro dun

ye ranj ka paira-e-dil-gir ajab hai

aankhon mein bichhe surmai maKHmal ki ada aur

mahmil mein phaTe honTon ki tahqir ajab hai

har inT meri nazm ko deti hai dilasa

ye kunj-e-ghazal sahn-e-maza mir ajab hai

daghon ki bahaaron se moattar hai koi jism

aur ism paDhe jaane mein taKHir ajab hai

ye KHak-basar husn ye mahtab ki Tahni

rondi hui sabze ki ye jagir ajab hai

nilae hue sehnon ki basti mein hai kohram

daryafta sayyare ki tasKHir ajab hai

dil sakte ke aalam se nikalta nahin 'amir'

ek baat ke sah jaane ki tasir ajab hai