is kar-e-gah-e-rang mein hum tang nahin kya

is kār-e-gah-e-rang meñ ham tañg nahīñ kyā

jo sar pe lagā hai abhī vo sañg nahīñ kyā

tasvīr ko tasvīr dikhā.ī nahīñ jaatī

is ā.ina-ḳhāne meñ nazar dañg nahīñ kyā

hai halqa-e-jāñ apnī vafāoñ kā tasavvur

is daaġh se aage koī farsañg nahīñ kyā

har baat pe ham dete haiñ ġhairoñ kā havāla

apnā koī āhañg koī rañg nahīñ kyā

baḳhshe hue ik ghūñT pe ham jhuum rahe haiñ

ab maañg ke piinā bhī koī nañg nahīñ kyā

zaḳhm-e-dil-e-betāb hai hāthoñ meñ nivāla

is baat pe duniyā se mirī jañg nahīñ kyā

vo rañg nahīñ sho.ala-e-ehsās meñ 'bāqī'

ham sāz-e-tamannā se ham-āhañg nahīñ kyā

is kar-e-gah-e-rang mein hum tang nahin kya

jo sar pe laga hai abhi wo sang nahin kya

taswir ko taswir dikhai nahin jati

is aaina-KHane mein nazar dang nahin kya

hai halqa-e-jaan apni wafaon ka tasawwur

is dagh se aage koi farsang nahin kya

har baat pe hum dete hain ghairon ka hawala

apna koi aahang koi rang nahin kya

baKHshe hue ek ghunT pe hum jhum rahe hain

ab mang ke pina bhi koi nang nahin kya

zaKHm-e-dil-e-betab hai hathon mein niwala

is baat pe duniya se meri jang nahin kya

wo rang nahin shoala-e-ehsas mein 'baqi'

hum saz-e-tamanna se ham-ahang nahin kya