is liye to bujha nahin hun main

is liye to bujhā nahīñ huuñ maiñ

bujhne vaalā diyā nahīñ huuñ maiñ

jo bhī hai sab mirā muqaddar hai

zindagī se ḳhafā nahīñ huuñ maiñ

merī tā'zīm kyoñ kare duniyā

aadmī huuñ ḳhudā nahīñ huuñ maiñ

āñdhiy.oñ saañs chal rahī hai abhī

jal rahā huuñ bujhā nahīñ huuñ maiñ

bas zarā talḳhiyāñ mizāj meñ haiñ

dosto sar-phirā nahīñ huuñ maiñ

log jitnā burā batāte haiñ

yaar utnā burā nahīñ huuñ maiñ

mustarad kar de jis ko ye duniyā

vo ġhalat faisla nahīñ huuñ maiñ

mujh ko apnī talāsh hai 'ālam'

ḳhud se ab tak milā nahīñ huuñ maiñ

is liye to bujha nahin hun main

bujhne wala diya nahin hun main

jo bhi hai sab mera muqaddar hai

zindagi se KHafa nahin hun main

meri ta'zim kyon kare duniya

aadmi hun KHuda nahin hun main

aandhiyon sans chal rahi hai abhi

jal raha hun bujha nahin hun main

bas zara talKHiyan mizaj mein hain

dosto sar-phira nahin hun main

log jitna bura batate hain

yar utna bura nahin hun main

mustarad kar de jis ko ye duniya

wo ghalat faisla nahin hun main

mujh ko apni talash hai 'alam'

KHud se ab tak mila nahin hun main