is mariz-e-gham-e-ghurbat ko sambhaala de do

is marīz-e-ġham-e-ġhurbat ko sambhālā de do

zehn-e-tārīk ko yādoñ kā ujālā de do

ham haiñ vo log ki beqaum vatan kahlā.e

ham ko jiine ke liye koī havāla de do

maiñ bhī sach kahtā huuñ is jurm meñ duniyā vaalo

mere hāthoñ meñ bhī ik zahr kā pyāla de do

ab bhī kuchh log mohabbat pe yaqīñ rakhte haiñ

ho jo mumkin to unheñ des nikālā de do

vo nirāle haiñ karo zikr tum un kā 'dānish'

apnī ġhazloñ ko bhī andāz nirālā de do

is mariz-e-gham-e-ghurbat ko sambhaala de do

zehn-e-tarik ko yaadon ka ujala de do

hum hain wo log ki beqaum watan kahlae

hum ko jine ke liye koi hawala de do

main bhi sach kahta hun is jurm mein duniya walo

mere hathon mein bhi ek zahr ka pyala de do

ab bhi kuchh log mohabbat pe yaqin rakhte hain

ho jo mumkin to unhen des nikala de do

wo nirale hain karo zikr tum un ka 'danish'

apni ghazlon ko bhi andaz nirala de do