is qadar bhi to meri jaan na tarsaya kar

is qadar bhī to mirī jaan na tarsāyā kar

mil ke tanhā tū gale se kabhī lag jaayā kar

dekh kar ham ko na parde meñ tū chhup jaayā kar

ham to apne haiñ miyāñ ġhair se sharmāyā kar

ye burī ḳhū hai dilā tujh meñ ḳhudā kī saugand

dekh us but ko tū hairān na rah jaayā kar

haath merā bhī jo pahuñchā to maiñ samjhūñgā ḳhuub

ye añgūThā tū kisī aur ko dikhlāyā kar

gar tū aatā nahīñ hai ālam-e-bedārī meñ

ḳhvāb meñ tū kabhī ai rāhat-e-jāñ aayā kar

ai sabā auroñ kī turbat pe gul-afshānī chand

jānib-e-gor-e-ġharībāñ bhī kabhī aayā kar

ham bhī ai jān-e-man itne to nahīñ nākāra

kabhī kuchh kaam tū ham ko bhī to farmāyā kar

tujh ko khā jā.egā ai 'mus.hafī' ye ġham ik roz

dil ke jaane kā tū itnā bhī na ġham khāyā kar

is qadar bhi to meri jaan na tarsaya kar

mil ke tanha tu gale se kabhi lag jaya kar

dekh kar hum ko na parde mein tu chhup jaya kar

hum to apne hain miyan ghair se sharmaya kar

ye buri KHu hai dila tujh mein KHuda ki saugand

dekh us but ko tu hairan na rah jaya kar

hath mera bhi jo pahuncha to main samjhunga KHub

ye anguTha tu kisi aur ko dikhlaya kar

gar tu aata nahin hai aalam-e-bedari mein

KHwab mein tu kabhi ai rahat-e-jaan aaya kar

ai saba auron ki turbat pe gul-afshani chand

jaanib-e-gor-e-ghariban bhi kabhi aaya kar

hum bhi ai jaan-e-man itne to nahin nakara

kabhi kuchh kaam tu hum ko bhi to farmaya kar

tujh ko kha jaega ai 'mushafi' ye gham ek roz

dil ke jaane ka tu itna bhi na gham khaya kar