is qadar Duba hua dil dard ki lazzat mein hai

is qadar Duubā huā dil dard kī lazzat meñ hai

terā 'āshiq anjuman hī kyuuñ na ho ḳhalvat meñ hai

jazb kar lenā tajallī ruuh kī 'ādat meñ hai

husn ko mahfūz rakhnā 'ishq kī fitrat meñ hai

mahv ho jaatā huuñ aksar maiñ ki dushman huuñ tirā

dilkashī kis darja ai duniyā tirī sūrat meñ hai

uf nikal jaatī hai ḳhatre hī kā mauqa kyuuñ na ho

husn se betāb ho jaanā mirī fitrat meñ hai

us kā ik adnā karishma ruuh vo itnā 'ajīb

'aql isti.ajāb meñ hai falsafa hairat meñ hai

nuur kā taḌkā hai dhīmī ho chalī hai chāñdnī

hil rahā hai dil mirā masrūf vo zīnat meñ hai

is qadar Duba hua dil dard ki lazzat mein hai

tera 'ashiq anjuman hi kyun na ho KHalwat mein hai

jazb kar lena tajalli ruh ki 'adat mein hai

husn ko mahfuz rakhna 'ishq ki fitrat mein hai

mahw ho jata hun aksar main ki dushman hun tera

dilkashi kis darja ai duniya teri surat mein hai

uf nikal jati hai KHatre hi ka mauqa kyun na ho

husn se betab ho jaana meri fitrat mein hai

us ka ek adna karishma ruh wo itna 'ajib

'aql istiajab mein hai falsafa hairat mein hai

nur ka taDka hai dhimi ho chali hai chandni

hil raha hai dil mera masruf wo zinat mein hai