is qadar hijr ke dhagon se nikal aaya tha

is qadar hijr ke dhāgoñ se nikal aaya thā

maiñ tirī yaad ke reshoñ se nikal aaya thā

Tiis uTThī thī kahīñ zer-e-zamīñ aur idhar

shahr kā shahr makānoñ se nikal aaya thā

raat ḳhāmoshī mire jism meñ yuuñ phailī thī

lams kā shor bhī kānoñ se nikal aaya thā

maiñ ne pheñkā thā use taish meñ aa kar lekin

ashk tasvīr kī āñkhoñ se nikal aaya thā

maiñ ne ik peḌ ke saa.e meñ duā māñgī thī

aur parinda mirī poroñ se nikal aaya thā

us ne āvāz kī taḳhtī pe mirā naam likhā

aur maiñ lafz ke hoñToñ se nikal aaya thā

maiñ ne qirtās pe rakkhī thī faqat aañkh 'munīr'

ḳhvāb tahrīr kī darzoñ se nikal aaya thā

is qadar hijr ke dhagon se nikal aaya tha

main teri yaad ke reshon se nikal aaya tha

Tis uTThi thi kahin zer-e-zamin aur idhar

shahr ka shahr makanon se nikal aaya tha

raat KHamoshi mere jism mein yun phaili thi

lams ka shor bhi kanon se nikal aaya tha

main ne phenka tha use taish mein aa kar lekin

ashk taswir ki aankhon se nikal aaya tha

main ne ek peD ke sae mein dua mangi thi

aur parinda meri poron se nikal aaya tha

us ne aawaz ki taKHti pe mera nam likha

aur main lafz ke honTon se nikal aaya tha

main ne qirtas pe rakkhi thi faqat aankh 'munir'

KHwab tahrir ki darzon se nikal aaya tha