is qadar zulm-o-sitam ai sitam-ijad na kar

is qadar zulm-o-sitam ai sitam-ījād na kar

ḳhaak ham ḳhāk-nashīnoñ kī tū barbād na kar

ishq un kā mire pahlū meñ ye detā hai sadā

bhuul jā apnī ḳhudī ġhair ko bhī yaad na kar

sabr lāzim hai tujhe koh-e-mohabbat pe zarūr

jazb-e-dil ko tū kahīñ taisha-e-farhād na kar

sho.ala-e-hijr se ḳhuuñ ḳhushk huā hai us kā

rag-e-āshiq pe sitam nashtar-e-fassād na kar

qaid-e-ġham se kahīñ āzād bhī ho jān-e-hazīñ

qatl karne meñ tāmul mire jallād na kar

fasl-e-gul aa.ī hai shādāb huā hai gulshan

bulbul-e-zār tū yaañ shevan-o-faryād na kar

jazb-e-dil saath 'jamīla' kā nahīñ chhoḌegā

ġham nahīñ ḳhizr rah-e-ishq meñ imdād na kar

is qadar zulm-o-sitam ai sitam-ijad na kar

KHak hum KHak-nashinon ki tu barbaad na kar

ishq un ka mere pahlu mein ye deta hai sada

bhul ja apni KHudi ghair ko bhi yaad na kar

sabr lazim hai tujhe koh-e-mohabbat pe zarur

jazb-e-dil ko tu kahin taisha-e-farhad na kar

shoala-e-hijr se KHun KHushk hua hai us ka

rag-e-ashiq pe sitam nashtar-e-fassad na kar

qaid-e-gham se kahin aazad bhi ho jaan-e-hazin

qatl karne mein tamul mere jallad na kar

fasl-e-gul aai hai shadab hua hai gulshan

bulbul-e-zar tu yan shewan-o-faryaad na kar

jazb-e-dil sath 'jamila' ka nahin chhoDega

gham nahin KHizr rah-e-ishq mein imdad na kar