is safar mein nim-jaan main bhi nahin tu bhi nahin

is safar meñ nīm-jāñ maiñ bhī nahīñ tū bhī nahīñ

aur zer-e-sā.ebāñ maiñ bhī nahīñ tū bhī nahīñ

zahr meñ Duubī huī parchhā.iyoñ kā raqs hai

ḳhud se vābasta yahāñ maiñ bhī nahīñ tū bhī nahīñ

nā-tamāmī ke sharar meñ roz o shab jalte rahe

sach to ye hai be-zabāñ maiñ bhī nahīñ tū bhī nahīñ

zard lafzoñ ke dhundalke shaam kī āñkhoñ meñ haiñ

garche zeb-e-dāstāñ maiñ bhī nahīñ tū bhī nahīñ

nā-tavāñ jismoñ pe kyuuñ hai gardishoñ kā mor-nāch

shab-gazīda āsmāñ maiñ bhī nahīñ tū bhī nahīñ

be-asar ho jaa.e jis se dil kā zaḳhm-e-ātishīñ

marham-e-vahm-o-gumāñ maiñ bhī nahīñ tū bhī nahīñ

shab kī gahrī ḳhāmushī bhī gosh-bar-āvāz hai

āhaToñ kā kārvāñ maiñ bhī nahīñ tū bhī nahīñ

ehtiyātoñ kī guzargāheñ to pīchhe rah ga.iiñ

ab sadā-e-mehrbāñ maiñ bhī nahīñ tū bhī nahīñ

is safar mein nim-jaan main bhi nahin tu bhi nahin

aur zer-e-saeban main bhi nahin tu bhi nahin

zahr mein Dubi hui parchhaiyon ka raqs hai

KHud se wabasta yahan main bhi nahin tu bhi nahin

na-tamami ke sharar mein roz o shab jalte rahe

sach to ye hai be-zaban main bhi nahin tu bhi nahin

zard lafzon ke dhundalke sham ki aankhon mein hain

garche zeb-e-dastan main bhi nahin tu bhi nahin

na-tawan jismon pe kyun hai gardishon ka mor-nach

shab-gazida aasman main bhi nahin tu bhi nahin

be-asar ho jae jis se dil ka zaKHm-e-atishin

marham-e-wahm-o-guman main bhi nahin tu bhi nahin

shab ki gahri KHamushi bhi gosh-bar-awaz hai

aahaTon ka karwan main bhi nahin tu bhi nahin

ehtiyaton ki guzargahen to pichhe rah gain

ab sada-e-mehrban main bhi nahin tu bhi nahin