is se pahle ki koi aur haTa de mujhko

is se pahle ki koī aur haTā de mujh ko

apne pahlū se kahīñ duur biThā de mujh ko

maiñ suḳhan-fahm kisī vasl kā muhtāj nahīñ

chāñdnī raat hai ik sher sunā de mujh ko

ḳhud-kushī karne ke mausam nahīñ aate har roz

zindagī ab koī rasta na dikhā de mujh ko

ek ye zaḳhm hī kaafī hai mire jiine ko

chārāgar Thiik na hone kī davā de mujh ko

yuuñ to sūraj huuñ magar fikr lagī rahtī hai

vo charāġhoñ ke bharam meñ na bujhā de mujh ko

tujh ko ma.alūm nahīñ ishq kise kahte haiñ

apne siine pe nahīñ dil meñ jagah de mujh ko

har na.e shaḳhs pe khul jaane kī aadat 'mohan'

dene vaale se kaho thoḌī anā de mujh ke

is se pahle ki koi aur haTa de mujh ko

apne pahlu se kahin dur biTha de mujh ko

main suKHan-fahm kisi wasl ka muhtaj nahin

chandni raat hai ek sher suna de mujh ko

KHud-kushi karne ke mausam nahin aate har roz

zindagi ab koi rasta na dikha de mujh ko

ek ye zaKHm hi kafi hai mere jine ko

chaaragar Thik na hone ki dawa de mujh ko

yun to suraj hun magar fikr lagi rahti hai

wo charaghon ke bharam mein na bujha de mujh ko

tujh ko malum nahin ishq kise kahte hain

apne sine pe nahin dil mein jagah de mujh ko

har nae shaKHs pe khul jaane ki aadat 'mohan'

dene wale se kaho thoDi ana de mujh ke