is shahr-e-nigaran mein koi tujh sa nahin hai

is shahr-e-nigārāñ meñ koī tujh sā nahīñ hai

maiñ kaise batā.ūñ tujhe tū kitnā hasīñ hai

phūloñ kā gudāz ik tire paikar kā havāla

mahtāb se baḌh kar tirī raḳhshanda jabīñ hai

ḳhushbū tire sāñsoñ kī rachī hai rag-o-pai meñ

mahsūs yahī hotā hai tū mere qarīñ hai

kam milne kā ehsās-e-garāñ lagtā hai terā

ab lutf-o-karam bhī tirā pahle sā nahīñ hai

vo jhiil kī pahnā.ī meñ ik qatra hai lekin

ruk jaatā hai jab palkoñ pe aa kar to nagīñ hai

zikr-e-ġham-e-dil auroñ se achchhā nahīñ lagtā

ye dard-e-mohabbat to mire dil kā makīñ hai

hañstā huā miltā thā sadā bazm meñ 'tanhā'

ab jaane vo kyoñ itnā udaas aur hazīñ hai

is shahr-e-nigaran mein koi tujh sa nahin hai

main kaise bataun tujhe tu kitna hasin hai

phulon ka gudaz ek tere paikar ka hawala

mahtab se baDh kar teri raKHshanda jabin hai

KHushbu tere sanson ki rachi hai rag-o-pai mein

mahsus yahi hota hai tu mere qarin hai

kam milne ka ehsas-e-garan lagta hai tera

ab lutf-o-karam bhi tera pahle sa nahin hai

wo jhil ki pahnai mein ek qatra hai lekin

ruk jata hai jab palkon pe aa kar to nagin hai

zikr-e-gham-e-dil auron se achchha nahin lagta

ye dard-e-mohabbat to mere dil ka makin hai

hansta hua milta tha sada bazm mein 'tanha'

ab jaane wo kyon itna udas aur hazin hai