is tarah aah kal hum us anjuman se nikle

is tarah aah kal ham us anjuman se nikle

fasl-e-bahār meñ juuñ bulbul chaman se nikle

aatī lapaT hai jaisī us zulf-e-ambarīñ se

kyā taab hai jo vo bū mushk-e-ḳhutan se nikle

tum ko na ek par bhī raham aah shab ko aayā

kyā kyā hī aah o naale apne dahan se nikle

ab hai duā ye apnī har shaam har sahar ko

yā vo badan se lipTe yā jaan tan se nikle

to jāniyo muqarrar us ko 'surūr' āshiq

kuchh dard kī sī hālat jis ke suḳhan se nikle

is tarah aah kal hum us anjuman se nikle

fasl-e-bahaar mein jun bulbul chaman se nikle

aati lapaT hai jaisi us zulf-e-ambarin se

kya tab hai jo wo bu mushk-e-KHutan se nikle

tum ko na ek par bhi raham aah shab ko aaya

kya kya hi aah o nale apne dahan se nikle

ab hai dua ye apni har sham har sahar ko

ya wo badan se lipTe ya jaan tan se nikle

to jaaniyo muqarrar us ko 'surur' aashiq

kuchh dard ki si haalat jis ke suKHan se nikle