is tarah denge wasl mein takrar ka jawab

is tarah deñge vasl meñ takrār kā javāb

marnā hamārā hai tire inkār kā javāb

aisā lagāyā haath ki tasma nahīñ rahā

duniyā meñ ab nahīñ tirī talvār kā javāb

bulbul zarā idhar bhī vahī naġhma-sanjiyāñ

siina hamārā hai tire gulzār kā javāb

ushshāq jaan bechne aate haiñ roz-o-shab

kūcha hai terā misr ke bāzār kā javāb

be-ḳhud huā na raaz khulā is kā sāqiyā

mai-ḳhvāroñ meñ nahīñ tire mai-ḳhvār kā javāb

talvoñ meñ chubh ke ḳhuun se gulnār ho gayā

gulshan meñ gul bhī hai koī is ḳhaar kā javāb

qātil ke haath uThāte hī bijlī chamak ga.ī

talvār se milā use talvār kā javāb

surma lagā rahā thā ki merī nazar paḌī

ā.īne meñ milā nigah-e-yār kā javāb

merī to zindagī meñ na va.ada vafā huā

ik hashr rah gayā tire iqrār kā javāb

nāseh ne kī nasīhateñ phir chup hī ho gayā

kal shab ko sun ke tere vafādār kā javāb

ye shā.irī kā ḳhabt hai ḳhāmosh ai 'shafīq'

bekār kā savāl hai bekār kā javāb

is tarah denge wasl mein takrar ka jawab

marna hamara hai tere inkar ka jawab

aisa lagaya hath ki tasma nahin raha

duniya mein ab nahin teri talwar ka jawab

bulbul zara idhar bhi wahi naghma-sanjiyan

sina hamara hai tere gulzar ka jawab

ushshaq jaan bechne aate hain roz-o-shab

kucha hai tera misr ke bazar ka jawab

be-KHud hua na raaz khula is ka saqiya

mai-KHwaron mein nahin tere mai-KHwar ka jawab

talwon mein chubh ke KHun se gulnar ho gaya

gulshan mein gul bhi hai koi is KHar ka jawab

qatil ke hath uThate hi bijli chamak gai

talwar se mila use talwar ka jawab

surma laga raha tha ki meri nazar paDi

aaine mein mila nigah-e-yar ka jawab

meri to zindagi mein na wada wafa hua

ek hashr rah gaya tere iqrar ka jawab

naseh ne ki nasihaten phir chup hi ho gaya

kal shab ko sun ke tere wafadar ka jawab

ye shairi ka KHabt hai KHamosh ai 'shafiq'

bekar ka sawal hai bekar ka jawab