is tarah hajat-e-asir na khinch

is tarah hājat-e-asīr na khīñch

bhiik de kāsa-e-faqīr na khīñch

rahm kar kuchh to dast-e-majbūrī

jaan le le magar zamīr na khīñch

ye kahānī baḌī munāfiq hai

is meñ yūñhī mirā sharīr na khīñch

dā.ere shauq se banā lekin

ab koī ḳhuun kī lakīr na khīñch

lafz vāpas bhī lauT sakte haiñ

apne lahje meñ koī tiir na khīñch

apnā uslūb ban sake to banā

sher meñ 'ġhālib' aur 'mīr' na khīñch

aane vaale surāġh chāhte haiñ

ai havā naqsh-e-rāhgīr na khīñch

ye sharāfat bhī ek rassī hai

TuuT jā.egī mere viir na khīñch

is tarah hajat-e-asir na khinch

bhik de kasa-e-faqir na khinch

rahm kar kuchh to dast-e-majburi

jaan le le magar zamir na khinch

ye kahani baDi munafiq hai

is mein yunhi mera sharir na khinch

daere shauq se bana lekin

ab koi KHun ki lakir na khinch

lafz wapas bhi lauT sakte hain

apne lahje mein koi tir na khinch

apna uslub ban sake to bana

sher mein 'ghaalib' aur 'mir' na khinch

aane wale suragh chahte hain

ai hawa naqsh-e-rahgir na khinch

ye sharafat bhi ek rassi hai

TuT jaegi mere wir na khinch