is tarah mahw-e-jamal-e-moatabar ho jaiye

is tarah mahv-e-jamāl-e-mo'atabar ho jā.iye

jab naqāb uTThe to sar-tā-pā nazar ho jā.iye

ḳhud ko raushan kījiye ḳhud jalva-gar ho jā.iye

apnī sub.h-o-shām ke shams-o-qamar ho jā.iye

haq-parast-o-haq-shanās-o-haq-nigar ho jā.iye

raat ke māhaul meñ nūr-e-sahar ho jā.iye

dhuup ke māroñ ko jis kī chhāñv meñ rāhat mile

reg-zār-e-zindagī meñ vo shajar ho jā.iye

dekh kar insān par insān ke zulm-o-sitam

jī meñ aatā hai ki mahrūm-e-nazar ho jā.iye

vaqt vo hai chhoḌ kar sab maslahat-andeshiyāñ

aur bhī dīvāna-o-shorīda-sar ho jā.iye

log chun leñ jis kī tahrīreñ havāloñ ke liye

zindagī kī vo kitāb-e-motabar ho jā.iye

ḳhaak honā hī muqaddar meñ hai ai 'zāhid' to phir

ḳhāk-e-pā-e-sayyad-e-vālā-guhar ho jā.iye

is tarah mahw-e-jamal-e-mo'atabar ho jaiye

jab naqab uTThe to sar-ta-pa nazar ho jaiye

KHud ko raushan kijiye KHud jalwa-gar ho jaiye

apni subh-o-sham ke shams-o-qamar ho jaiye

haq-parast-o-haq-shanas-o-haq-nigar ho jaiye

raat ke mahaul mein nur-e-sahar ho jaiye

dhup ke maron ko jis ki chhanw mein rahat mile

reg-zar-e-zindagi mein wo shajar ho jaiye

dekh kar insan par insan ke zulm-o-sitam

ji mein aata hai ki mahrum-e-nazar ho jaiye

waqt wo hai chhoD kar sab maslahat-andeshiyan

aur bhi diwana-o-shorida-sar ho jaiye

log chun len jis ki tahriren hawalon ke liye

zindagi ki wo kitab-e-motabar ho jaiye

KHak hona hi muqaddar mein hai ai 'zahid' to phir

KHak-e-pa-e-sayyad-e-wala-guhar ho jaiye