is tarah sath nibhna hai dushwar sa

is tarah saath nibhnā hai dushvār sā

tū bhī talvār sā maiñ bhī talvār sā

apnā rang-e-ġhazal us ke ruḳhsār sā

dil chamakne lagā hai ruḳh-e-yār sā

ab hai TuuTā sā dil ḳhud se bezār sā

is havelī meñ lagtā thā darbār sā

ḳhūb-sūrat sī pairoñ meñ zanjīr ho

ghar meñ baiThā rahūñ maiñ giraftār sā

maiñ farishtoñ kī sohbat ke laa.iq nahīñ

ham-safar koī hotā gunahgār sā

guḌiyā guDDe ko bechā ḳharīdā gayā

ghar sajāyā gayā raat bāzār sā

shaam tak kitne hāthoñ se guzrūñgā maiñ

chā.e-ḳhāne meñ urdu ke aḳhbār sā

baat kyā hai ki mash.hūr logoñ ke ghar

maut kā sog hotā hai tyauhār sā

ziina ziina utartā huā aa.ina

us kā lahja anokhā khanak-dār sā

is tarah sath nibhna hai dushwar sa

tu bhi talwar sa main bhi talwar sa

apna rang-e-ghazal us ke ruKHsar sa

dil chamakne laga hai ruKH-e-yar sa

ab hai TuTa sa dil KHud se bezar sa

is haweli mein lagta tha darbar sa

KHub-surat si pairon mein zanjir ho

ghar mein baiTha rahun main giraftar sa

main farishton ki sohbat ke laiq nahin

ham-safar koi hota gunahgar sa

guDiya guDDe ko becha KHarida gaya

ghar sajaya gaya raat bazar sa

sham tak kitne hathon se guzrunga main

chae-KHane mein urdu ke aKHbar sa

baat kya hai ki mashhur logon ke ghar

maut ka sog hota hai tyauhaar sa

zina zina utarta hua aaina

us ka lahja anokha khanak-dar sa