is tarah yaad aane se kya faeda

is tarah yaad aane se kyā fā.eda

muft ehsāñ jatāne se kyā fā.eda

jis jagah dil hī jhuktā nahīñ aap kā

us jagah sar jhukāne se kyā fā.eda

ḳhatm kuchh dam meñ ho jā.egī raushnī

sham.a kī lau baḌhāne se kyā fā.eda

apne dushman se vāqif to haiñ ham magar

naam us kā batāne se kyā fā.eda

khul ke hañsiye tabāhī pe merī huzūr

zer-e-lab muskurāne se kyā fā.eda

apne dil se maiñ kartā huuñ aksar savāl

un kī mahfil meñ jaane se kyā fā.eda

aur ubhreñge naqsh-e-qadam aap ke

merī turbat miTāne se kyā fā.eda

nīchī nazreñ uThāte to ik baat thī

jaam aage baḌhāne se kyā fā.eda

jin ko aatā thā vo to na aa.e 'sa.īd'

mausam-e-gul ke aane se kyā fā.eda

is tarah yaad aane se kya faeda

muft ehsan jatane se kya faeda

jis jagah dil hi jhukta nahin aap ka

us jagah sar jhukane se kya faeda

KHatm kuchh dam mein ho jaegi raushni

shama ki lau baDhane se kya faeda

apne dushman se waqif to hain hum magar

nam us ka batane se kya faeda

khul ke hansiye tabahi pe meri huzur

zer-e-lab muskurane se kya faeda

apne dil se main karta hun aksar sawal

un ki mahfil mein jaane se kya faeda

aur ubhrenge naqsh-e-qadam aap ke

meri turbat miTane se kya faeda

nichi nazren uThate to ek baat thi

jam aage baDhane se kya faeda

jin ko aata tha wo to na aae 'said'

mausam-e-gul ke aane se kya faeda