is tilsim-e-roz-o-shab se to kabhi niklo zara

is tilsim-e-roz-o-shab se to kabhī niklo zarā

kam se kam vijdān ke sahrā hī meñ ghūmo zarā

naam kitne hī likhe haiñ dil kī ik mehrāb par

hogā in meñ hī tumhārā naam bhī DhūñDo zarā

bad-gumānī kī yahī ġhairoñ ko kaafī hai sazā

muskurā kar phir usī din kī tarah dekho zarā

vaqt ke patthar ke nīche ik dabā chashma huuñ maiñ

aao pyāso mil ke ye patthar uThāo to zarā

husn ik dariyā hai sahrā bhī haiñ us kī raah meñ

kal kahāñ hogā ye dariyā ye bhī to socho zarā

do kaloñ ke biich meñ ik aaj huuñ uljhā huā

merī is kam-fursatī ke karb ko samjho zarā

vus.at-e-kaun-o-makāñ bhī ab huī jaatī hai tañg

aur bhī kuchh ai junūñ vaalo abhī simTo zarā

thak ga.e hoge bahut pur-pech thī chāhat kī raah

aao merī god meñ sar rakh ke sustā lo zarā

ek miTte lafz ke bhī kaam aa jaao kabhī

sañg-e-dil par miTne se pahle mujhe likh lo zarā

hai ta.āqub meñ 'na.īmī' saaya sā ik roz o shab

dost hī shāyad ho koī muḌ ke to dekho zarā

is tilsim-e-roz-o-shab se to kabhi niklo zara

kam se kam wijdan ke sahra hi mein ghumo zara

nam kitne hi likhe hain dil ki ek mehrab par

hoga in mein hi tumhaara nam bhi DhunDo zara

bad-gumani ki yahi ghairon ko kafi hai saza

muskura kar phir usi din ki tarah dekho zara

waqt ke patthar ke niche ek daba chashma hun main

aao pyaso mil ke ye patthar uThao to zara

husn ek dariya hai sahra bhi hain us ki rah mein

kal kahan hoga ye dariya ye bhi to socho zara

do kalon ke bich mein ek aaj hun uljha hua

meri is kam-fursati ke karb ko samjho zara

wusat-e-kaun-o-makan bhi ab hui jati hai tang

aur bhi kuchh ai junun walo abhi simTo zara

thak gae hoge bahut pur-pech thi chahat ki rah

aao meri god mein sar rakh ke susta lo zara

ek miTte lafz ke bhi kaam aa jao kabhi

sang-e-dil par miTne se pahle mujhe likh lo zara

hai taaqub mein 'naimi' saya sa ek roz o shab

dost hi shayad ho koi muD ke to dekho zara