ise saman-e-safar jaan ye jugnu rakh le

ise sāmān-e-safar jaan ye jugnū rakh le

raah meñ tīrgī hogī mire aañsū rakh le

tū jo chāhe to tirā jhuuT bhī bik saktā hai

shart itnī hai ki sone kī tarāzū rakh le

vo koī jism nahīñ hai ki use chhū bhī sakeñ

haañ agar naam hī rakhnā hai to ḳhushbū rakh le

tujh ko an-dekhī bulandī meñ safar karnā hai

ehtiyātan mirī himmat mire baazū rakh le

mirī ḳhvāhish hai ki āñgan meñ na dīvār uThe

mire bhaa.ī mire hisse kī zamīñ tū rakh le

ise saman-e-safar jaan ye jugnu rakh le

rah mein tirgi hogi mere aansu rakh le

tu jo chahe to tera jhuT bhi bik sakta hai

shart itni hai ki sone ki taraazu rakh le

wo koi jism nahin hai ki use chhu bhi saken

han agar nam hi rakhna hai to KHushbu rakh le

tujh ko an-dekhi bulandi mein safar karna hai

ehtiyatan meri himmat mere bazu rakh le

meri KHwahish hai ki aangan mein na diwar uThe

mere bhai mere hisse ki zamin tu rakh le