ishq-e-sitam-parast kya husn-e-sitam-shiar kya

ishq-e-sitam-parast kyā husn-e-sitam-shi.ār kyā

ham bhī unhīñ ke haiñ to phir apnā bhī e'tibār kyā

ishrat-e-zīst kī qasam ishrat-e-musta.ār kyā

ġham bhī jo mustaqil na ho ġham kā bhī e'tibār kyā

miTtī huī hayāt kyā luTtī huī bahār kyā

ya.anī qarīb-e-sub.h-e-ġham sham.a kā e'tibār kyā

yaad se un kī kaam rakh dard kā ehtimām rakh

maut bhī aa hī jā.egī maut kā intizār kyā

baḌhtī raheñgī tā-ba-kai ahl-e-junūñ kī vahshateñ

chhupte raheñge vo pas-e-ā.īna-e-bahār kyā

qīmat-e-kā.enāt kyā un kī nigāh-e-nāz meñ

fitna-e-hashr ke liye fitna-e-rozgār kyā

rāh-e-darāz jabr hai kahte haiñ jis ko zindagī

rāh-e-darāz-e-jabr meñ manzil-e-iḳhtiyār kyā

itnā bhī intizār-e-dost haa.e ye e'tibār-e-dost

ai dil-e-be-qarār-e-dost dost pe iḳhtiyār kyā

ishq se sar-garāñ na ho husn se bad-gumāñ na ho

jis ke liye ḳhizāñ na ho us ke liye bahār kyā

yaad meñ terī pā liyā maiñ ne sukūn-e-zindagī

ab tirī yaad meñ mujhe chain kyā qarār kyā

merī nazar se dekhiye apnā jamāl-e-be-misāl

chashm-e-bahār-sāz meñ ā.īna-e-bahār kyā

merī vafā vafā nahīñ un kī jafā jafā nahīñ

haa.e usī kā naam hai ālam-e-e'tibār kyā

'bāsit'-e-figār kī yaad bhī kyā na aa.egī

ab na suneñge ham-vatan nāla-e-be-qarār kyā

ishq-e-sitam-parast kya husn-e-sitam-shiar kya

hum bhi unhin ke hain to phir apna bhi e'tibar kya

ishrat-e-zist ki qasam ishrat-e-mustaar kya

gham bhi jo mustaqil na ho gham ka bhi e'tibar kya

miTti hui hayat kya luTti hui bahaar kya

yani qarib-e-subh-e-gham shama ka e'tibar kya

yaad se un ki kaam rakh dard ka ehtimam rakh

maut bhi aa hi jaegi maut ka intizar kya

baDhti rahengi ta-ba-kai ahl-e-junun ki wahshaten

chhupte rahenge wo pas-e-aina-e-bahaar kya

qimat-e-kaenat kya un ki nigah-e-naz mein

fitna-e-hashr ke liye fitna-e-rozgar kya

rah-e-daraaz jabr hai kahte hain jis ko zindagi

rah-e-daraaz-e-jabr mein manzil-e-iKHtiyar kya

itna bhi intizar-e-dost hae ye e'tibar-e-dost

ai dil-e-be-qarar-e-dost dost pe iKHtiyar kya

ishq se sar-garan na ho husn se bad-guman na ho

jis ke liye KHizan na ho us ke liye bahaar kya

yaad mein teri pa liya main ne sukun-e-zindagi

ab teri yaad mein mujhe chain kya qarar kya

meri nazar se dekhiye apna jamal-e-be-misal

chashm-e-bahaar-saz mein aaina-e-bahaar kya

meri wafa wafa nahin un ki jafa jafa nahin

hae usi ka nam hai aalam-e-e'tibar kya

'basit'-e-figar ki yaad bhi kya na aaegi

ab na sunenge ham-watan nala-e-be-qarar kya