ishq hai nam mera husn ka shaidai hun

ishq hai naam mirā husn kā shaidā.ī huuñ

baat ye aur ki mahrūm-e-pazīrā.ī huuñ

qāfile ġham ke jahāñ rukte haiñ dam lene ko

maiñ vahī sāya-e-dīvār-e-shakebā.ī huuñ

kuchh is andāz se uThtī rahī hāsid kī nazar

jaise maiñ hī sabab-e-anjuman-ārā.ī huuñ

nukta-chīñ mere mire ḳhuuñ kī safedī pe na jā

maiñ na.e daur ke bhaa.ī kā sagā bhaa.ī huuñ

misra-e-tar ke kabhī paañv phisal jaate haiñ

jaise maiñ rāh-e-taḳhayyul pe jamī kaa.ī huuñ

gin liye uḌte hue tā.ir-e-lāhūt ke par

kaun kahtā hai ki gum-karda-e-bīnā.ī huuñ

kam-nazar haiñ vo jo kamzor samajhte haiñ mujhe

atomī daur kī tāqat huuñ tavānā.ī huuñ

dil dahal jaate haiñ faulād sī chaTTānoñ ke

shor-e-tanhā.ī huuñ āvāza-e-barnā.ī huuñ

ye mirā apnā tarīqa hai ḳhud-āgāhī kā

ḳhud tamāshā huuñ 'ufuq' ḳhud hī tamāshā.ī huuñ

ishq hai nam mera husn ka shaidai hun

baat ye aur ki mahrum-e-pazirai hun

qafile gham ke jahan rukte hain dam lene ko

main wahi saya-e-diwar-e-shakebai hun

kuchh is andaz se uThti rahi hasid ki nazar

jaise main hi sabab-e-anjuman-arai hun

nukta-chin mere mere KHun ki safedi pe na ja

main nae daur ke bhai ka saga bhai hun

misra-e-tar ke kabhi panw phisal jate hain

jaise main rah-e-taKHayyul pe jami kai hun

gin liye uDte hue tair-e-lahut ke par

kaun kahta hai ki gum-karda-e-binai hun

kam-nazar hain wo jo kamzor samajhte hain mujhe

atomi daur ki taqat hun tawanai hun

dil dahal jate hain faulad si chaTTanon ke

shor-e-tanhai hun aawaza-e-barnai hun

ye mera apna tariqa hai KHud-agahi ka

KHud tamasha hun 'ufuq' KHud hi tamashai hun