ishq hamare KHayal paDa hai KHwab gai aaram gaya

ishq hamāre ḳhayāl paḌā hai ḳhvāb ga.ī ārām gayā

jī kā jaanā Thahar rahā hai sub.h gayā yā shaam gayā

ishq kiyā so diin gayā īmān gayā islām gayā

dil ne aisā kaam kiyā kuchh jis se maiñ nākām gayā

kis kis apnī kal ko rove hijrāñ meñ bekal us kā

ḳhvāb ga.ī hai taab ga.ī hai chain gayā ārām gayā

aayā yaañ se jaanā hī to jī kā chhupānā kyā hāsil

aaj gayā yā kal jāvegā sub.h gayā yā shaam gayā

haa.e javānī kyā kyā kahiye shor saroñ meñ rakhte the

ab kyā hai vo ahd gayā vo mausam vo hañgām gayā

gaalī jhiḌkī ḳhashm-o-ḳhushūnat ye to sar-e-dast aksar haiñ

lutf gayā ehsān gayā in.aam gayā ikrām gayā

likhnā kahnā tark huā thā aapas meñ to muddat se

ab jo qarār kiyā hai dil se ḳhat bhī gayā paiġhām gayā

nāla-e-'mīr' savād meñ ham tak doshīñ shab se nahīñ aayā

shāyad shahr se us zālim ke āshiq vo badnām gayā

ishq hamare KHayal paDa hai KHwab gai aaram gaya

ji ka jaana Thahar raha hai subh gaya ya sham gaya

ishq kiya so din gaya iman gaya islam gaya

dil ne aisa kaam kiya kuchh jis se main nakaam gaya

kis kis apni kal ko rowe hijran mein bekal us ka

KHwab gai hai tab gai hai chain gaya aaram gaya

aaya yan se jaana hi to ji ka chhupana kya hasil

aaj gaya ya kal jawega subh gaya ya sham gaya

hae jawani kya kya kahiye shor saron mein rakhte the

ab kya hai wo ahd gaya wo mausam wo hangam gaya

gali jhiDki KHashm-o-KHushunat ye to sar-e-dast aksar hain

lutf gaya ehsan gaya inam gaya ikram gaya

likhna kahna tark hua tha aapas mein to muddat se

ab jo qarar kiya hai dil se KHat bhi gaya paigham gaya

nala-e-'mir' sawad mein hum tak doshin shab se nahin aaya

shayad shahr se us zalim ke aashiq wo badnam gaya