ishq jab zamzama-paira hoga

ishq jab zamzama-pairā hogā

husn ḳhud mahv-e-tamāshā hogā

sun ke āvāza-e-zanjīr-e-sabā

qafas-e-ġhuncha kā dar vā hogā

jaras-e-shauq agar saath rahī

har-nafas shahpar-e-anqā hogā

daa.im ābād rahegī duniyā

ham na hoñge koī ham sā hogā

kaun dekhegā tulū-e-ḳhurshī

zarra jab dīda-e-bīnā hogā

ham tujhe bhuul ke ḳhush baiThe haiñ

ham sā bedard koī kyā hogā

phir sulagne lagā sahrā-e-ḳhayāl

abr ghir kar kahīñ barsā hogā

phir kisī dhyān ke sad-rāhe par

dil-e-hairat-zadā tanhā hogā

phir kisī sub.h-e-tarab kā jaadū

parda-e-shab se huvaidā hogā

gul-zamīnoñ ke ḳhunuk ramnoñ meñ

jashn-e-rāmish-garī barpā hogā

phir na.ī rut kā ishāra pā kar

vo saman-bū chaman-ārā hogā

gul-shab-tāb kī ḳhushbū le kar

ablaq-e-sub.h ravāna hogā

phir sar-e-shāḳh-e-shuā-e-ḳhurshīd

nik.hat-e-gul kā baserā hogā

ik sadā sañg meñ taḌpī hogī

ik sharar phuul meñ larzā hogā

tujh ko har phuul meñ uryāñ sote

chāñdnī-rāt ne dekhā hogā

dekh kar ā.ina-e-āb-e-ravāñ

patta patta lab-e-goyā hogā

shaam se soch rahā huuñ 'nāsir'

chāñd kis shahr meñ utrā hogā

ishq jab zamzama-paira hoga

husn KHud mahw-e-tamasha hoga

sun ke aawaza-e-zanjir-e-saba

qafas-e-ghuncha ka dar wa hoga

jaras-e-shauq agar sath rahi

har-nafas shahpar-e-anqa hoga

daim aabaad rahegi duniya

hum na honge koi hum sa hoga

kaun dekhega tulu-e-KHurshi

zarra jab dida-e-bina hoga

hum tujhe bhul ke KHush baiThe hain

hum sa bedard koi kya hoga

phir sulagne laga sahra-e-KHayal

abr ghir kar kahin barsa hoga

phir kisi dhyan ke sad-rahe par

dil-e-hairat-zada tanha hoga

phir kisi subh-e-tarab ka jadu

parda-e-shab se huwaida hoga

gul-zaminon ke KHunuk ramnon mein

jashn-e-ramish-gari barpa hoga

phir nai rut ka ishaara pa kar

wo saman-bu chaman-ara hoga

gul-shab-tab ki KHushbu le kar

ablaq-e-subh rawana hoga

phir sar-e-shaKH-e-shua-e-KHurshid

nikhat-e-gul ka basera hoga

ek sada sang mein taDpi hogi

ek sharar phul mein larza hoga

tujh ko har phul mein uryan sote

chandni-raat ne dekha hoga

dekh kar aaina-e-ab-e-rawan

patta patta lab-e-goya hoga

sham se soch raha hun 'nasir'

chand kis shahr mein utra hoga