ishq ka marhala mere liye dushwar nahin

ishq kā marhala mere liye dushvār nahīñ

mere qisse meñ shahanshāh kā kirdār nahīñ

sang barsegā na logoñ kī malāmat hogī

merī duniyā meñ koī najd kā bāzār nahīñ

koī farhād nahīñ maiñ jo karūñ koh-kanī

mere anjām meñ teshe kā bhī kirdār nahīñ

romeo jaisā marūñ zahar-e-mohabbat khā kar

juliet sī koī laḌkī mujhe darkār nahīñ

hiir ke vāste jogī maiñ banūñ nā-mumkin

rāñjhe kī tarah bichhaḌne ko maiñ tayyār nahīñ

maiñ vo yūsuf nahīñ jo pākī-e-dāman dekhe

daur-e-hāzir meñ zuleḳhā kī bhī sarkār nahīñ

maiñ na.e daur kā āshiq huuñ mirā mauqif hai

ishq sansār meñ hai ishq hī sansār nahīñ

ghanToñ bāteñ maiñ karūñ haa.e hello likhtā rahūñ

garche shā.ir huuñ mirī jaan maiñ be-kār nahīñ

aaj milnā hai kahā piir ko us ne 'kāshif'

maiñ ne reply kiyā jaan ye itvār nahīñ

ishq ka marhala mere liye dushwar nahin

mere qisse mein shahanshah ka kirdar nahin

sang barsega na logon ki malamat hogi

meri duniya mein koi najd ka bazar nahin

koi farhad nahin main jo karun koh-kani

mere anjam mein teshe ka bhi kirdar nahin

romeo jaisa marun zahar-e-mohabbat kha kar

juliet si koi laDki mujhe darkar nahin

hir ke waste jogi main banun na-mumkin

ranjhe ki tarah bichhaDne ko main tayyar nahin

main wo yusuf nahin jo paki-e-daman dekhe

daur-e-hazir mein zuleKHa ki bhi sarkar nahin

main nae daur ka aashiq hun mera mauqif hai

ishq sansar mein hai ishq hi sansar nahin

ghanTon baaten main karun hae hello likhta rahun

garche shair hun meri jaan main be-kar nahin

aaj milna hai kaha pir ko us ne 'kashif'

main ne reply kiya jaan ye itwar nahin