ishq karne mein dil bhi kya hai shoKH

ishq karne meñ dil bhī kyā hai shoḳh

saikaḌoñ meñ se ik chunā hai shoḳh

ye bhī shoḳhī na.ī nikālī hai

aaj dushman se kuchh ḳhafā hai shoḳh

apnī āñkhoñ meñ raat din rakh kar

maiñ ne ḳhud us ko kar diyā hai shoḳh

ashk-e-ḳhūñ mere dekh kar bole

is se to kuchh mirī hinā hai shoḳh

aañkh se gir ke god meñ machlā

tifl-e-ashk aisā ho gayā hai shoḳh

bosa har vaqt ruḳh kā letā hai

kis qadar gesū-e-dotā hai shoḳh

chheḌtī hai tumhāre zulfoñ ko

kis balā kī magar sabā hai shoḳh

bar meñ ā.īna ke liyā na qarār

jān-e-man aks bhī tirā hai shoḳh

phir ga.ī duur se dikhā ke jhalak

hijr meñ ai 'saḳhī' qazā hai shoḳh

ishq karne mein dil bhi kya hai shoKH

saikaDon mein se ek chuna hai shoKH

ye bhi shoKHi nai nikali hai

aaj dushman se kuchh KHafa hai shoKH

apni aankhon mein raat din rakh kar

main ne KHud us ko kar diya hai shoKH

ashk-e-KHun mere dekh kar bole

is se to kuchh meri hina hai shoKH

aankh se gir ke god mein machla

tifl-e-ashk aisa ho gaya hai shoKH

bosa har waqt ruKH ka leta hai

kis qadar gesu-e-dota hai shoKH

chheDti hai tumhaare zulfon ko

kis bala ki magar saba hai shoKH

bar mein aaina ke liya na qarar

jaan-e-man aks bhi tera hai shoKH

phir gai dur se dikha ke jhalak

hijr mein ai 'saKHi' qaza hai shoKH