ishq ke aqlim mein chaal-o-chalan kuchh aur hai

ishq ke aqlīm meñ chāl-o-chalan kuchh aur hai

hai nirālā Dhañg vaañ kā aur ajā.ib taur hai

ḳhūn-e-dil piitī haiñ vaañ aur khātī haiñ laḳht-e-jigar

lutf ke badle uThāne ko jafā-o-jaur hai

un kī galiyoñ meñ nahīñ hotā guzar hī aql kā

hai junūñ kā band-o-bast aur āshiqī kā daur hai

zindagī aur marg shādī aur ġham aur nek-o-bad

ek saañ haiñ sab vahāñ lekin maqām-e-ġhaur hai

lā-makāñ hai vāste un kī maqām-e-būd-o-bāsh

go ba-zāhir kahne ko kalkatta aur lahore hai

āh-o-nāla kī chalā kartī haiñ vaañ tīr-o-sinān

jo ki jaatā hai vahāñ rahtā vahīñ vo Thor hai

ibtidā meñ jiite jī mar jaanā paḌtā hai vahāñ

par jo mar jaatā hai vaañ jiitā vahīñ fil-faur hai

huuñ maiñ jān-o-dil se 'āsim' shāh-e-ḳhādim par fidā

ishq ke kishvar meñ jis kī shān-o-shaukat aur hai

ishq ke aqlim mein chaal-o-chalan kuchh aur hai

hai nirala Dhang wan ka aur ajaib taur hai

KHun-e-dil piti hain wan aur khati hain laKHt-e-jigar

lutf ke badle uThane ko jafa-o-jaur hai

un ki galiyon mein nahin hota guzar hi aql ka

hai junun ka band-o-bast aur aashiqi ka daur hai

zindagi aur marg shadi aur gham aur nek-o-bad

ek san hain sab wahan lekin maqam-e-ghaur hai

la-makan hai waste un ki maqam-e-bud-o-bash

go ba-zahir kahne ko kalkatta aur lahore hai

aah-o-nala ki chala karti hain wan tir-o-sinan

jo ki jata hai wahan rahta wahin wo Thor hai

ibtida mein jite ji mar jaana paDta hai wahan

par jo mar jata hai wan jita wahin fil-faur hai

hun main jaan-o-dil se 'asim' shah-e-KHadim par fida

ishq ke kishwar mein jis ki shan-o-shaukat aur hai