ishq ke nam pe daim rahe zindan aabaad

ishq ke naam pe daa.im rahe zindāñ ābād

chāk-e-tāza se rahe merā garebāñ ābād

qais ke ba.ad kisī ne kabhī pūchhā hī nahīñ

ham ko hī karnā paḌā phir se bayābāñ ābād

taḳhtiyāñ laTkī huī naam kī darvāzoñ par

ham ne dekhe haiñ yahāñ kitne hī zindāñ ābād

ham ne rakkhī na kabhī apne gharoñdoñ pe nazar

ham ne dekhe haiñ sadā ḳhvāb ke aivāñ ābād

kahīñ īmān meñ ilhād milā hai shāmil

nazar aayā hai kahīñ kufr meñ īmāñ ābād

kabhī tūfān meñ qatra bhī nahīñ thā shāmil

aur dekhā hai kabhī qatre meñ tūfāñ ābād

ek duniyā hai yahāñ ek zamāna hai yahāñ

yūñhī har aan rahe ye mirā dīvāñ ābād

ishq ke nam pe daim rahe zindan aabaad

chaak-e-taza se rahe mera gareban aabaad

qais ke baad kisi ne kabhi puchha hi nahin

hum ko hi karna paDa phir se bayaban aabaad

taKHtiyan laTki hui nam ki darwazon par

hum ne dekhe hain yahan kitne hi zindan aabaad

hum ne rakkhi na kabhi apne gharondon pe nazar

hum ne dekhe hain sada KHwab ke aiwan aabaad

kahin iman mein ilhad mila hai shamil

nazar aaya hai kahin kufr mein iman aabaad

kabhi tufan mein qatra bhi nahin tha shamil

aur dekha hai kabhi qatre mein tufan aabaad

ek duniya hai yahan ek zamana hai yahan

yunhi har aan rahe ye mera diwan aabaad