ishq KHudai-KHarab hai aisa jis se gae hain ghar ke ghar

ishq ḳhudā.ī-ḳharāb hai aisā jis se ga.e haiñ ghar ke ghar

ka.aba-o-dair ke aivānoñ ke gire paḌe haiñ dar ke dar

haj se jo koī aadmī ho to saarā aalam haj hī kare

makke se aa.e shaiḳh jī lekin ve to vahī haiñ ḳhar ke ḳhar

ranj-o-ta.ab meñ marte dekhe ham ne mumsik daulat-mand

jī ke jī bhī abas jaate haiñ un logoñ ke zar ke zar

muslim o kāfir ke jhagḌe meñ jang-o-jadal se rihā.ī nahīñ

lothoñ pe lotheñ girtī raheñgī kaTte raheñge sar ke sar

saḳht musībat ishq meñ ye hai jāneñ chalī jaatī haiñ lek

haath saroñ par māreñge to band raheñge ghar ke ghar

kab se garmi-e-ishq ne mere chashma-e-chashm ko ḳhushk kiyā

kapḌe gale sab tan ke lekin ve haiñ ab tak tar ke tar

nikle ab ke qafas meñ shāyad koī kalī to nikle 'mīr'

saare tair shagufta chaman ke TuuTe ga.e ve par ke par

ishq KHudai-KHarab hai aisa jis se gae hain ghar ke ghar

kaba-o-dair ke aiwanon ke gire paDe hain dar ke dar

haj se jo koi aadmi ho to sara aalam haj hi kare

makke se aae shaiKH ji lekin we to wahi hain KHar ke KHar

ranj-o-tab mein marte dekhe hum ne mumsik daulat-mand

ji ke ji bhi abas jate hain un logon ke zar ke zar

muslim o kafir ke jhagDe mein jang-o-jadal se rihai nahin

lothon pe lothen girti rahengi kaTte rahenge sar ke sar

saKHt musibat ishq mein ye hai jaanen chali jati hain lek

hath saron par marenge to band rahenge ghar ke ghar

kab se garmi-e-ishq ne mere chashma-e-chashm ko KHushk kiya

kapDe gale sab tan ke lekin we hain ab tak tar ke tar

nikle ab ke qafas mein shayad koi kali to nikle 'mir'

sare tair shagufta chaman ke TuTe gae we par ke par