ishq ki bimari hai jinko dil hi dil mein galte hain

ishq kī bīmārī hai jin ko dil hī dil meñ galte haiñ

murde haiñ vo haqīqat meñ zāhir meñ phirte chalte haiñ

jab raah meñ mil ga.e kahne lage tere hī ghar meñ jaatā thā

jaao chale laḌkā tū nahīñ maiñ mujh ko apne machalte haiñ

auroñ ke lagāne-bujhāne se itnā jalāte ho mujh ko

Dariye hamārī aahoñ se ham log bhī jalte-balte haiñ

sab kahte haiñ un ke muñh meñ to āb-e-hayāt bharā hai sab

ham se jo karte haiñ bāteñ phir kyuuñ zahr ugalte haiñ

kaise hī dard kā sher paḌheñ ve yuuñ bhī na pūchhe kyā bak ga.e

jin ke dil patthar haiñ so kab in bātoñ se pighalte haiñ

bas kariye chup rahiye ab khulvānā rāzoñ kā ḳhuub nahīñ

malte haiñ ham haath paḌe koī aur kuchh aur hī malte haiñ

mere ashk-e-surḳh se tum yuuñ ġhāfil ho afsos afsos

dekho to ye la.al ke TukḌe kaise ḳhaak meñ rulte haiñ

shāyad aate jaate phir us ḳhāna-jañg se bigḌī hai

ghar se bahut kam mīr-'razā'-jī ab in rozoñ nikalte haiñ

ishq ki bimari hai jin ko dil hi dil mein galte hain

murde hain wo haqiqat mein zahir mein phirte chalte hain

jab rah mein mil gae kahne lage tere hi ghar mein jata tha

jao chale laDka tu nahin main mujh ko apne machalte hain

auron ke lagane-bujhane se itna jalate ho mujh ko

Dariye hamari aahon se hum log bhi jalte-balte hain

sab kahte hain un ke munh mein to aab-e-hayat bhara hai sab

hum se jo karte hain baaten phir kyun zahr ugalte hain

kaise hi dard ka sher paDhen we yun bhi na puchhe kya bak gae

jin ke dil patthar hain so kab in baaton se pighalte hain

bas kariye chup rahiye ab khulwana raazon ka KHub nahin

malte hain hum hath paDe koi aur kuchh aur hi malte hain

mere ashk-e-surKH se tum yun ghafil ho afsos afsos

dekho to ye lal ke TukDe kaise KHak mein rulte hain

shayad aate jate phir us KHana-jang se bigDi hai

ghar se bahut kam mir-'raza'-ji ab in rozon nikalte hain