ishq ki mayusiyon mein soz-e-pinhan kuchh nahin

ishq kī māyūsiyoñ meñ soz-e-pinhāñ kuchh nahīñ

is havā meñ ye charāġh-e-zer-e-dāmāñ kuchh nahīñ

kyā hai dekho hasrat-e-sair-e-gulistāñ kuchh nahīñ

kuchh nahīñ ai sakinān-e-kunj-e-zindāñ kuchh nahīñ

ishq kī hai ḳhud-numā.ī ishq kī āshuftagī

rū-e-tābāñ kuchh nahīñ zulf-e-pareshāñ kuchh nahīñ

yaad aa hī jaatī hai aksar dil-e-barbād kī

yuuñ to sach hai chand zarrāt-e-pareshāñ kuchh nahīñ

sach hai jo kuchh bhī hai vo hai garmī-e-bāzār-e-husn

ahl-e-dil kā soz-e-pinhāñ kuchh nahīñ haañ kuchh nahīñ

aur un kī zindagī hai aur unvān-e-hayāt

ḳhud-farāmoshoñ ko tere ahd-o-paimāñ kuchh nahīñ

ek ho jaa.e na jab tak sarhad-e-hosh-o-junūñ

ek ho kar chāk-e-dāmān-o-garebāñ kuchh nahīñ

jo na ho jaa.e vo kam hai jo bhī ho jaa.e bahut

kār-zār-e-ishq meñ dushvār-o-āsāñ kuchh nahīñ

dekhnī thī dekh lī is chheḌ kī bhī sādgī

be-diloñ meñ ye tabassum-hā-e-pinhāñ kuchh nahīñ

kaash apne dard se betāb hote ai 'firāq'

dūsre ke hāthoñ ye hāl-e-pareshāñ kuchh nahīñ

ishq ki mayusiyon mein soz-e-pinhan kuchh nahin

is hawa mein ye charagh-e-zer-e-daman kuchh nahin

kya hai dekho hasrat-e-sair-e-gulistan kuchh nahin

kuchh nahin ai sakinan-e-kunj-e-zindan kuchh nahin

ishq ki hai KHud-numai ishq ki aashuftagi

ru-e-taban kuchh nahin zulf-e-pareshan kuchh nahin

yaad aa hi jati hai aksar dil-e-barbaad ki

yun to sach hai chand zarraat-e-pareshan kuchh nahin

sach hai jo kuchh bhi hai wo hai garmi-e-bazar-e-husn

ahl-e-dil ka soz-e-pinhan kuchh nahin han kuchh nahin

aur un ki zindagi hai aur unwan-e-hayat

KHud-faramoshon ko tere ahd-o-paiman kuchh nahin

ek ho jae na jab tak sarhad-e-hosh-o-junun

ek ho kar chaak-e-daman-o-gareban kuchh nahin

jo na ho jae wo kam hai jo bhi ho jae bahut

kar-zar-e-ishq mein dushwar-o-asan kuchh nahin

dekhni thi dekh li is chheD ki bhi sadgi

be-dilon mein ye tabassum-ha-e-pinhan kuchh nahin

kash apne dard se betab hote ai 'firaq'

dusre ke hathon ye haal-e-pareshan kuchh nahin