ishq marhun-e-hikayat-o-guman bhi hoga

ishq marhūn-e-hikāyāt-o-gumāñ bhī hogā

vāqi.a hai to kisī taur bayāñ bhī hogā

dil atiyya kahīñ kartā to pareshāñ hogā

ḳhair o ḳhūbī se hī hogā vo jahāñ bhī hogā

ek din dekhnā ruk jā.eñge dariyā saare

ek din dekhnā ye dasht ravāñ bhī hogā

aap duniyā ko mohabbat kī davā bechte haiñ

aap ke paas ilāj-e-ġham-e-jāñ bhī hogā

ek din aa hī mileñge mire bichhḌe hue log

ḳhatm ik roz to ye kār-e-jahāñ bhī hogā

dil bhī vaisā hī hai kaifiyyat-e-jāñ hai jaisī

haal badlā to yahī raqs-kunāñ bhī hogā

shiddat-e-hijr hai mahsūs to hogī 'arshad'

bojh siine pe agar hai to girāñ bhī hogā

ishq marhun-e-hikayat-o-guman bhi hoga

waqia hai to kisi taur bayan bhi hoga

dil atiyya kahin karta to pareshan hoga

KHair o KHubi se hi hoga wo jahan bhi hoga

ek din dekhna ruk jaenge dariya sare

ek din dekhna ye dasht rawan bhi hoga

aap duniya ko mohabbat ki dawa bechte hain

aap ke pas ilaj-e-gham-e-jaan bhi hoga

ek din aa hi milenge mere bichhDe hue log

KHatm ek roz to ye kar-e-jahan bhi hoga

dil bhi waisa hi hai kaifiyyat-e-jaan hai jaisi

haal badla to yahi raqs-kunan bhi hoga

shiddat-e-hijr hai mahsus to hogi 'arshad'

bojh sine pe agar hai to giran bhi hoga