ishq mein dohri mashaqqat ki hai

'ishq meñ dohrī mashaqqat kī hai

hālat-e-hijr meñ hijrat kī hai

aisī vīrānī meñ karte bhī to kyā

ye bhī kuchh kam hai ki vahshat kī hai

baat merī nahīñ ai dar-ba-darī

baat ye bār-e-amānat kī hai

maiñ ki manzar meñ huuñ manzar kī tarah

ye bhī ik shakl sukūnat kī hai

paikar-e-gul kī talab thī lekin

partav-e-gul pe qanā'at kī hai

zaḳhm kī lau pe asar rakhtā huuñ

is diye ne mirī bai'at kī hai

'ishq mein dohri mashaqqat ki hai

haalat-e-hijr mein hijrat ki hai

aisi virani mein karte bhi to kya

ye bhi kuchh kam hai ki wahshat ki hai

baat meri nahin ai dar-ba-dari

baat ye bar-e-amanat ki hai

main ki manzar mein hun manzar ki tarah

ye bhi ek shakl sukunat ki hai

paikar-e-gul ki talab thi lekin

partaw-e-gul pe qana'at ki hai

zaKHm ki lau pe asar rakhta hun

is diye ne meri bai'at ki hai