ishq mein zillat hui KHiffat hui tohmat hui

ishq meñ zillat huī ḳhiffat huī tohmat huī

āḳhir āḳhir jaan dī yāroñ ne ye sohbat huī

aks us be-dīd kā to muttasil paḌtā thā sub.h

din chaḌhe kyā jānūñ ā.īne kī kyā sūrat huī

lauh-e-sīna par mirī sau neza-e-ḳhattī lage

ḳhastagī is dil-shikasta kī isī bābat huī

kholte hī āñkheñ phir yaañ mūñdnī ham ko paḌīñ

diid kyā koī kare vo kis qadar mohlat huī

paañv merā kalba-e-ahzāñ meñ ab rahtā nahīñ

rafta rafta us taraf jaane kī mujh ko lat huī

mar gayā āvāra ho kar maiñ to jaise gard-bād

par jise ye vāqi.a pahuñchā use vahshat huī

shaad o ḳhush-tāle koī hogā kisū ko chaah kar

maiñ to kulfat meñ rahā jab se mujhe ulfat huī

dil kā jaanā aaj kal taaza huā ho to kahūñ

guzre us bhī sānahe ko ham-nashīñ muddat huī

shauq-e-dil ham nā-tavānoñ kā likhā jaatā hai kab

ab talak aaphī pahuñchne kī agar tāqat huī

kyā kaf-e-dast ek maidāñ thā bayābāñ ishq kā

jaan se jab us meñ guzre tab hameñ rāhat huī

yuuñ to ham ājiz-tarīn-e-ḳhalq-e-ālam haiñ vale

dekhiyo qudrat ḳhudā kī gar hameñ qudrat huī

gosh zad chaT-paT hī marnā ishq meñ apne huā

kis ko is bīmāri-e-jāñkāh se fursat huī

be-zabāñ jo kahte haiñ mujh ko so chup rah jā.eñge

mārke meñ hashr ke gar baat kī ruḳhsat huī

ham na kahte the ki naqsh us kā nahīñ naqqāsh sahl

chāñd saarā lag gayā tab nīm-ruḳh sūrat huī

is ġhazal par shaam se to sūfiyoñ ko vajd thā

phir nahīñ ma.alūm kuchh majlis kī kyā hālat huī

kam kisū ko 'mīr' kī mayyat kī haath aa.ī namāz

na.ash par us be-sar-o-pā kī balā kasrat huī

ishq mein zillat hui KHiffat hui tohmat hui

aaKHir aaKHir jaan di yaron ne ye sohbat hui

aks us be-did ka to muttasil paDta tha subh

din chaDhe kya jaanun aaine ki kya surat hui

lauh-e-sina par meri sau neza-e-KHatti lage

KHastagi is dil-shikasta ki isi babat hui

kholte hi aankhen phir yan mundni hum ko paDin

did kya koi kare wo kis qadar mohlat hui

panw mera kalba-e-ahzan mein ab rahta nahin

rafta rafta us taraf jaane ki mujh ko lat hui

mar gaya aawara ho kar main to jaise gard-baad

par jise ye waqia pahuncha use wahshat hui

shad o KHush-tale koi hoga kisu ko chah kar

main to kulfat mein raha jab se mujhe ulfat hui

dil ka jaana aaj kal taza hua ho to kahun

guzre us bhi sanahe ko ham-nashin muddat hui

shauq-e-dil hum na-tawanon ka likha jata hai kab

ab talak aaphi pahunchne ki agar taqat hui

kya kaf-e-dast ek maidan tha bayaban ishq ka

jaan se jab us mein guzre tab hamein rahat hui

yun to hum aajiz-tarin-e-KHalq-e-alam hain wale

dekhiyo qudrat KHuda ki gar hamein qudrat hui

gosh zad chaT-paT hi marna ishq mein apne hua

kis ko is bimari-e-jaankah se fursat hui

be-zaban jo kahte hain mujh ko so chup rah jaenge

marke mein hashr ke gar baat ki ruKHsat hui

hum na kahte the ki naqsh us ka nahin naqqash sahl

chand sara lag gaya tab nim-ruKH surat hui

is ghazal par sham se to sufiyon ko wajd tha

phir nahin malum kuchh majlis ki kya haalat hui

kam kisu ko 'mir' ki mayyat ki hath aai namaz

nash par us be-sar-o-pa ki bala kasrat hui