ishq mera hai agar raat ki rani ki tarah

ishq merā hai agar raat kī raanī kī tarah

husn us kā bhī hai phūloñ kī javānī kī tarah

ai mirī jān-e-vafā terī vafāoñ kī qasam

tū mujhe yaad hai naanī kī kahānī kī tarah

kyā koī samjhe tire husn kī tahdārī ko

mujh pe khultī hai faqat misra-e-sānī kī tarah

kūcha-e-dil se guzartī haiñ jo terī yādeñ

ashk bahte haiñ mirī āñkhoñ se paanī kī tarah

chāhtā jab huuñ koī nazm kahūñ tere liye

maiñ ulajh jaatā huuñ alfāz-o-ma.ānī kī tarah

hai sivā kaun tire mujh ko jo taslīm kare

mere mahbūb mirī talḳh-bayānī kī tarah

na koī shor sharāba na koī halchal hai

zindagī lagtī hai Thahre hue paanī kī tarah

maiñ ne is dil kī tijorī meñ rakhā hai 'ālam'

us kī har chiiz ko anmol nishānī kī tarah

ishq mera hai agar raat ki rani ki tarah

husn us ka bhi hai phulon ki jawani ki tarah

ai meri jaan-e-wafa teri wafaon ki qasam

tu mujhe yaad hai nani ki kahani ki tarah

kya koi samjhe tere husn ki tahdari ko

mujh pe khulti hai faqat misra-e-sani ki tarah

kucha-e-dil se guzarti hain jo teri yaaden

ashk bahte hain meri aankhon se pani ki tarah

chahta jab hun koi nazm kahun tere liye

main ulajh jata hun alfaz-o-maani ki tarah

hai siwa kaun tere mujh ko jo taslim kare

mere mahbub meri talKH-bayani ki tarah

na koi shor sharaba na koi halchal hai

zindagi lagti hai Thahre hue pani ki tarah

main ne is dil ki tijori mein rakha hai 'alam'

us ki har chiz ko anmol nishani ki tarah