ishq miyan is aag mein mera zahir hi chamka dena

ishq miyāñ is aag meñ merā zāhir hī chamkā denā

mere badan kī miTTī ko zarā kundan-rañg banā denā

aao tumhārī nazr kareñ ham ek charāġh hikāyat kā

jab tak jaago raushan rakhnā niiñd aa.e to bujhā denā

biis ikkīs baras pīchhe hameñ kab tak milte rahnā hai

dekho, ab kī baar milo to dil kī baat batā denā

siine ke vīrāne meñ ye ḳhushbū ek karāmat hai

varna itnā sahal nahīñ thā raakh meñ phuul khilā denā

dil kī zamīñ tak raushniyāñ thīñ, chehre the, hariyālī thī

ab to jahāñ bhī sāhil paanā kashtī ko Thahrā denā

maulā, phir mire sahrā se bin barse bādal lauT ga.e

ḳhair, shikāyat koī nahīñ hai agle baras barsā denā

ḳhvāja ḳhizr suno ham kab se is bastī meñ bhaTakte haiñ

tum ko agar taklīf na ho to jangal tak pahuñchā denā

ishq miyan is aag mein mera zahir hi chamka dena

mere badan ki miTTi ko zara kundan-rang bana dena

aao tumhaari nazr karen hum ek charagh hikayat ka

jab tak jago raushan rakhna nind aae to bujha dena

bis ikkis baras pichhe hamein kab tak milte rahna hai

dekho, ab ki bar milo to dil ki baat bata dena

sine ke virane mein ye KHushbu ek karamat hai

warna itna sahal nahin tha rakh mein phul khila dena

dil ki zamin tak raushniyan thin, chehre the, hariyali thi

ab to jahan bhi sahil pana kashti ko Thahra dena

maula, phir mere sahra se bin barse baadal lauT gae

KHair, shikayat koi nahin hai agle baras barsa dena

KHwaja KHizr suno hum kab se is basti mein bhaTakte hain

tum ko agar taklif na ho to jangal tak pahuncha dena