ishq pagal kar gaya to kya karoge soch lo

ishq pāgal kar gayā to kyā karoge soch lo

sāneha aisā huā to kyā karoge soch lo

saath us ke har qadam chalne kī aadat kis liye

chhoḌ kar vo chal diyā to kyā karoge soch lo

shor bāhar hai abhī is vāste ḳhāmosh ho

shor andar se uThā to kyā karoge soch lo

kar rahe ho ghar nayā ta.amīr uḌtī ret par

ye achānak gir gayā to kyā karoge soch lo

lauT kar jaanā to hai āḳhir sabhī ko us taraf

sau baras bhī jī liyā to kyā karoge soch lo

dhaḌkaneñ maddham huī jaatī haiñ ai chāragaro

chaak dil kā sil gayā to kyā karoge soch lo

band palkoñ meñ adhūre ḳhvāb bante ho magar

koī in meñ aa basā to kyā karoge soch lo

dar darīche sab muqaffal kar ke baiThe ho magar

vo achānak aa gayā to kyā karoge soch lo

Dūbte sūraj kā chehra aur us kā naqsh-e-pā

jab ye manzar gum huā to kyā karoge soch lo

ishq pagal kar gaya to kya karoge soch lo

saneha aisa hua to kya karoge soch lo

sath us ke har qadam chalne ki aadat kis liye

chhoD kar wo chal diya to kya karoge soch lo

shor bahar hai abhi is waste KHamosh ho

shor andar se uTha to kya karoge soch lo

kar rahe ho ghar naya tamir uDti ret par

ye achanak gir gaya to kya karoge soch lo

lauT kar jaana to hai aaKHir sabhi ko us taraf

sau baras bhi ji liya to kya karoge soch lo

dhaDkanen maddham hui jati hain ai chaaragaro

chaak dil ka sil gaya to kya karoge soch lo

band palkon mein adhure KHwab bante ho magar

koi in mein aa basa to kya karoge soch lo

dar dariche sab muqaffal kar ke baiThe ho magar

wo achanak aa gaya to kya karoge soch lo

Dubte suraj ka chehra aur us ka naqsh-e-pa

jab ye manzar gum hua to kya karoge soch lo