ishq pahle to gulabon ki tarah hota hai

ishq pahle to gulāboñ kī tarah hotā hai

aur phir ba.ad meñ kāñToñ kī tarah hotā hai

saath rahte hue bhī saath nahīñ rahtā hai

apnā saaya bhī to ġhairoñ kī tarah hotā hai

koshāñ rahte haiñ ki TuuTe na kabhī us kā yaqīn

aur yaqīñ kāñch ke kanchoñ kī tarah hotā hai

dil kī āvāz sunī aur mohabbat kar lī

aadmī ishq meñ bachchoñ kī tarah hotā hai

jalva-e-yār kā manzar hai vo manzar kī jise

dekhne vaalā bhī andhoñ kī tarah hotā hai

is liye maiñ ne tire ġham kī hifāzat kī hai

ġham purānā ho to phūloñ kī tarah hotā hai

ek hī scene meñ pastī se bulandī kā safar

zindagī meñ kahāñ filmoñ kī tarah hotā hai

maiñ ne dekhā to nahīñ 'mīr' kā dīvān magar

jāntā huuñ tirī āñkhoñ kī tarah hotā hai

ishq pahle to gulabon ki tarah hota hai

aur phir baad mein kanTon ki tarah hota hai

sath rahte hue bhi sath nahin rahta hai

apna saya bhi to ghairon ki tarah hota hai

koshan rahte hain ki TuTe na kabhi us ka yaqin

aur yaqin kanch ke kanchon ki tarah hota hai

dil ki aawaz suni aur mohabbat kar li

aadmi ishq mein bachchon ki tarah hota hai

jalwa-e-yar ka manzar hai wo manzar ki jise

dekhne wala bhi andhon ki tarah hota hai

is liye main ne tere gham ki hifazat ki hai

gham purana ho to phulon ki tarah hota hai

ek hi scene mein pasti se bulandi ka safar

zindagi mein kahan filmon ki tarah hota hai

main ne dekha to nahin 'mir' ka diwan magar

jaanta hun teri aankhon ki tarah hota hai