ishq se bhag ke jaya bhi nahin ja sakta

ishq se bhaag ke jaayā bhī nahīñ jā saktā

naqsh-e-yak-ḳhvāb miTāyā bhī nahīñ jā saktā

ham use dekh ke nazreñ bhī haTā sakte nahīñ

aur use dekhne jaayā bhī nahīñ jā saktā

vo kahīñ ḳhvāb meñ poshīda koī ḳhvāb sahī

der tak dard dabāyā bhī nahīñ jā saktā

zer-e-lab haiñ jo sadā.eñ koī suntā hī nahīñ

aur bahut shor machāyā bhī nahīñ jā saktā

dil chhupāyā kisī titlī ke paroñ ke nīche

ye chhupānā to chhupāyā bhī nahīñ jā saktā

raat ne giit sunāyā thā kisī sub.h kā giit

giit aisā kahīñ gaayā bhī nahīñ jā saktā

ik nayā rañg uḌāyā hai in ā.ankhoñ se 'atā'

rañg rañgoñ meñ milāyā bhī nahīñ jā saktā

ishq se bhag ke jaya bhi nahin ja sakta

naqsh-e-yak-KHwab miTaya bhi nahin ja sakta

hum use dekh ke nazren bhi haTa sakte nahin

aur use dekhne jaya bhi nahin ja sakta

wo kahin KHwab mein poshida koi KHwab sahi

der tak dard dabaya bhi nahin ja sakta

zer-e-lab hain jo sadaen koi sunta hi nahin

aur bahut shor machaya bhi nahin ja sakta

dil chhupaya kisi titli ke paron ke niche

ye chhupana to chhupaya bhi nahin ja sakta

raat ne git sunaya tha kisi subh ka git

git aisa kahin gaya bhi nahin ja sakta

ek naya rang uDaya hai in aaankhon se 'ata'

rang rangon mein milaya bhi nahin ja sakta