ishq wo ishq hai jo jazb-o-asar tak pahunche

ishq vo ishq hai jo jazb-o-asar tak pahuñche

husn vo husn hai jo ahl-e-nazar tak pahuñche

dil ke hāthoñ na kisī dil ko zarar tak pahuñche

lab par aa.ī huī kyoñ fitna-o-shar tak pahuñche

kyoñ mohabbat meñ koī naqd-o-nazar tak pahuñche

mujh ko tauhīn-e-vafā kī na ḳhabar tak pahuñche

tishnagī zauq-e-takallum kī vahī hai ab tak

us ke jalve to bahut merī nazar tak pahuñche

ek ham haiñ jo rahe tāba-e-farmāñ ho kar

ek tum ho jo abas fitna-o-shar tak pahuñche

nā-tavānī thī har ik gaam pe maa.il lekin

ham umīdoñ ke sahāre tire dar tak pahuñche

dekhiye aur hai kyā apne muqaddar meñ abhī

zulmat-e-shab se to haiñ nūr-e-sahar tak pahuñche

maiñ to har aag ko gulzār banā saktā huuñ

kaun aisā hai jo us husn-e-nazar tak pahuñche

aap ne mujh ko mire haal pe chhoḌā hotā

aap be-kār mire aib-o-hunar tak pahuñche

un kī furqat meñ mirā shaġhl yahī thā din-rāt

haath jab dil se uThe dīda-e-tar tak pahuñche

ai 'kañval' mujh pe unhoñ ne bhī karam farmāyā

vo bhī ab bahr-e-ayādat mire ghar tak pahuñche

ishq wo ishq hai jo jazb-o-asar tak pahunche

husn wo husn hai jo ahl-e-nazar tak pahunche

dil ke hathon na kisi dil ko zarar tak pahunche

lab par aai hui kyon fitna-o-shar tak pahunche

kyon mohabbat mein koi naqd-o-nazar tak pahunche

mujh ko tauhin-e-wafa ki na KHabar tak pahunche

tishnagi zauq-e-takallum ki wahi hai ab tak

us ke jalwe to bahut meri nazar tak pahunche

ek hum hain jo rahe taba-e-farman ho kar

ek tum ho jo abas fitna-o-shar tak pahunche

na-tawani thi har ek gam pe mail lekin

hum umidon ke sahaare tere dar tak pahunche

dekhiye aur hai kya apne muqaddar mein abhi

zulmat-e-shab se to hain nur-e-sahar tak pahunche

main to har aag ko gulzar bana sakta hun

kaun aisa hai jo us husn-e-nazar tak pahunche

aap ne mujh ko mere haal pe chhoDa hota

aap be-kar mere aib-o-hunar tak pahunche

un ki furqat mein mera shaghl yahi tha din-raat

hath jab dil se uThe dida-e-tar tak pahunche

ai 'kanwal' mujh pe unhon ne bhi karam farmaya

wo bhi ab bahr-e-ayaadat mere ghar tak pahunche