udas sham ghane peD aur hawa aur main

udaas shaam ghane peḌ aur havā aur maiñ

vo TimTimātā huā duur ik diyā aur maiñ

shikasta-hāl muñDeroñ pe jugnuoñ kā nuzūl

ḳhayāl-o-ḳhvāb kā halkā sā jhuTpuTā aur maiñ

vo raat aur vo sargoshiyāñ bahāroñ kī

vo chhat vo chāñd vo bādal vo ratjagā aur maiñ

malī-dalī sī razā.ī muḌā-tuḌā takiya

aur āñsuoñ kī umañDtī huī ghaTā aur maiñ

purāne ghar meñ na.ī zindagī ke hangāme

nayā nayā mire kamre kā aa.ina aur maiñ

dabī-dabī sī hañsī jāmunī dupaTTe biich

vahī sharīr vahī bāvlī havā aur maiñ

vo shab vo shor vo andoh-e-āgahī kā hujūm

ye dil ye husn-e-tamannā kā mo'jiza aur maiñ

ik intizār magar kis kā intizār hai ab

ye dastakoñ se ulajhtī huī havā aur maiñ

bahut muhīt bahut be-karāñ ḳhamoshī meñ

kalām kartā huā bas mirā ḳhudā aur maiñ

udas sham ghane peD aur hawa aur main

wo TimTimata hua dur ek diya aur main

shikasta-haal munDeron pe jugnuon ka nuzul

KHayal-o-KHwab ka halka sa jhuTpuTa aur main

wo raat aur wo sargoshiyan bahaaron ki

wo chhat wo chand wo baadal wo ratjaga aur main

mali-dali si razai muDa-tuDa takiya

aur aansuon ki umanDti hui ghaTa aur main

purane ghar mein nai zindagi ke hangame

naya naya mere kamre ka aaina aur main

dabi-dabi si hansi jamuni dupaTTe bich

wahi sharir wahi bawli hawa aur main

wo shab wo shor wo andoh-e-agahi ka hujum

ye dil ye husn-e-tamanna ka mo'jiza aur main

ek intizar magar kis ka intizar hai ab

ye dastakon se ulajhti hui hawa aur main

bahut muhit bahut be-karan KHamoshi mein

kalam karta hua bas mera KHuda aur main