isi aashiqi mein paiham hui KHanuman-KHarabi

isī āshiqī meñ paiham huī ḳhānumāñ-ḳharābī

dil-e-mubtalā kī ab tak hai vahī junūñ-ma.ābī

rahe soz-e-ishq lekin ga.e hosh phir na aa.eñ

vo tajalliyoñ se pur hai tirī chashm kī gulābī

hameñ tum ab apnī mahfil meñ bulā ke kyā karoge

na vo josh-e-bāryābī na vo hosh-e-kāmyābī

jo sune to daad mumkin hai magar bhalā sune kyuuñ

merī bebasī ke shikve tirā husn-e-lā-javābī

magar itnī sādgī bhī to bajā.e ḳhud adā hai

ba-ḳhayāl-e-parda-dārī ba-jamāl-e-āftābī

mirī aarzū nigāhī ne sitam kiyā sikhā kar

tire is shabāb-e-rañgīñ ko mazāq-e-be-hijābī

koī hoshyār kyūñkar ise dilbarī meñ jaane

ye nazar ki jo ba-zāhir hai shuā-e-nīm-ḳhvābī

na sahī 'suhā' ki aalam pe ho āshkār varna

mirī ḳhāksāriyoñ meñ hai shikva-e-bū-turābī

isi aashiqi mein paiham hui KHanuman-KHarabi

dil-e-mubtala ki ab tak hai wahi junun-maabi

rahe soz-e-ishq lekin gae hosh phir na aaen

wo tajalliyon se pur hai teri chashm ki gulabi

hamein tum ab apni mahfil mein bula ke kya karoge

na wo josh-e-baryabi na wo hosh-e-kaamyabi

jo sune to dad mumkin hai magar bhala sune kyun

meri bebasi ke shikwe tera husn-e-la-jawabi

magar itni sadgi bhi to bajae KHud ada hai

ba-KHayal-e-parda-dari ba-jamal-e-aftabi

meri aarzu nigahi ne sitam kiya sikha kar

tere is shabab-e-rangin ko mazaq-e-be-hijabi

koi hoshyar kyunkar ise dilbari mein jaane

ye nazar ki jo ba-zahir hai shua-e-nim-KHwabi

na sahi 'suha' ki aalam pe ho aashkar warna

meri KHaksariyon mein hai shikwa-e-bu-turabi