isi dar se isi diwar se aage nahin baDhta

isī dar se isī dīvār se aage nahīñ baḌhtā

ye kaisā pyaar hai jo pyaar se aage nahīñ baḌhtā

hamārī ḳhvāhisheñ iz.hār kī had tak nahīñ jātīñ

hamārā hausla dīdār se aage nahīñ baḌhtā

hamārī zindagī meñ ek sustī sī musalsal hai

hamārā ḳhuun is raftār se aage nahīñ baḌhtā

kisī ke haath se pī kar kisī ko bhuul jaate haiñ

hamārā dard is me.aar se aage nahīñ baḌhtā

hamārī zindagī logoñ meñ rah kar bhī akelī hai

hamārā rāsta bāzār se aage nahīñ baḌhtā

ajab ik qaht hai us aañkh meñ tere havāle se

chhalak kar ashk bhī ruḳhsār se aage nahīñ baḌhtā

hamārī justujū hai ham tire iqrār tak pahuñcheñ

hamārā ḳhvāb ik inkār se aage nahīñ baḌhtā

hamārī soch terī gard-e-pā ko chhū nahīñ saktī

hamārā zehn is āzār se aage nahīñ baḌhtā

hamārī aarzū 'zīshān' puurī hī nahīñ hotī

hamārā mas.ala aḳhbār se aage nahīñ baḌhtā

isi dar se isi diwar se aage nahin baDhta

ye kaisa pyar hai jo pyar se aage nahin baDhta

hamari KHwahishen izhaar ki had tak nahin jatin

hamara hausla didar se aage nahin baDhta

hamari zindagi mein ek susti si musalsal hai

hamara KHun is raftar se aage nahin baDhta

kisi ke hath se pi kar kisi ko bhul jate hain

hamara dard is mear se aage nahin baDhta

hamari zindagi logon mein rah kar bhi akeli hai

hamara rasta bazar se aage nahin baDhta

ajab ek qaht hai us aankh mein tere hawale se

chhalak kar ashk bhi ruKHsar se aage nahin baDhta

hamari justuju hai hum tere iqrar tak pahunchen

hamara KHwab ek inkar se aage nahin baDhta

hamari soch teri gard-e-pa ko chhu nahin sakti

hamara zehn is aazar se aage nahin baDhta

hamari aarzu 'zishan' puri hi nahin hoti

hamara masala aKHbar se aage nahin baDhta