isi jagah pe andheron ke ghol palte hain

isī jagah pe añdheroñ ke ġhol palte haiñ

so bām-o-dar pe charāġhoñ kā nuur malte haiñ

vo ḳhush-ḳhisāl agar dastaras meñ aa jaa.e

hamāre haath hamāre laboñ se jalte haiñ

tumhāre hijr ko fāqa-kashī nahīñ sauñpī

tumhāre dard mire āñsuoñ pe palte haiñ

tumhāre qurb kī hiddat kā hī tamāshā hai

zarā zarā sā jo ham raat bhar pighalte haiñ

mirā nasīb hai aise maqām-e-ibrat par

jo haath rakhte nahīñ haiñ vo haath malte haiñ

hamārī aañkh ko mat sauñp ye matā-e-girāñ

ki tere ḳhvāb in āñkhoñ se kab sañbhalte haiñ

tumhārī chup kā taqāza hai ḳhālī-pan 'abdul'

na sar jhukāo ḳhudārā faqīr chalte haiñ

isi jagah pe andheron ke ghol palte hain

so baam-o-dar pe charaghon ka nur malte hain

wo KHush-KHisal agar dastaras mein aa jae

hamare hath hamare labon se jalte hain

tumhaare hijr ko faqa-kashi nahin saunpi

tumhaare dard mere aansuon pe palte hain

tumhaare qurb ki hiddat ka hi tamasha hai

zara zara sa jo hum raat bhar pighalte hain

mera nasib hai aise maqam-e-ibrat par

jo hath rakhte nahin hain wo hath malte hain

hamari aankh ko mat saunp ye mata-e-giran

ki tere KHwab in aankhon se kab sanbhalte hain

tumhaari chup ka taqaza hai KHali-pan 'abdul'

na sar jhukao KHudara faqir chalte hain