isi ko han isi ko ishq ka nazrana kahte hain

isī ko haañ isī ko ishq kā nazrāna kahte haiñ

sarishk-e-ġham ko ya.anī gauhar-e-yak-dāna kahte haiñ

hañsī aatī hai mastoñ ko junūñ-nā-āshnāoñ par

kare jo hosh kī bāteñ use dīvāna kahte haiñ

kisī ko ġham kisī kā hai kisī ko ġham kisī kā hai

ba-unvān-e-digar sab ek hī afsāna kahte haiñ

uThā degī unheñ duniyā kisī din apne hāthoñ se

jo is mehmāñ-sarā meñ ḳhud ko sāhab-ḳhāna kahte haiñ

nahīñ ehsās kuchh bhī apnī mohsin-nā-shanāsī kā

chaman meñ rah ke bhī sabza ko ham begāna kahte haiñ

tasavvur ne badal dī hai dil-e-barbād kī sūrat

ye ka.aba thā magar ab ham ise but-ḳhāna kahte haiñ

samā.ī rakhne vāloñ kā dahan vā ho nahīñ saktā

jo haiñ kam-zarf rāz-e-bāda-o-paimāna kahte haiñ

samajh saktā nahīñ koī zabāñ ahl-e-mohabbat kī

jise apnā samajhte haiñ use begāna kahte haiñ

nazar aatā nahīñ duniyā kā naqsha mo'atabar koī

use bastī samajhte haiñ na ham vīrāna kahte haiñ

ba-qadr-e-ārzū koī yahāñ rahne nahīñ paatā

ġhalat kyā hai jo duniyā ko musāfir-ḳhāna kahte haiñ

patange hī ke sar sahrā bañdhe kyoñ sarfaroshī kā

jo apnī jaan par khele use parvāna kahte haiñ

aqīdat se sar-e-momin jhukā hai sang-e-asvad par

isī ko ittihād-e-ka.aba-o-but-ḳhāna kahte haiñ

nazar aatā hai sarmastī kā aalam zarre zarre meñ

isī nisbat se ham duniyā ko ik mai-ḳhāna kahte haiñ

'nazar' aur 'shād' kī ġhazloñ pe 'tālib' kā ġhazal kahnā

vo jur.at hai jise sab jur.at-e-rindāna kahte haiñ

isi ko han isi ko ishq ka nazrana kahte hain

sarishk-e-gham ko yani gauhar-e-yak-dana kahte hain

hansi aati hai maston ko junun-na-ashnaon par

kare jo hosh ki baaten use diwana kahte hain

kisi ko gham kisi ka hai kisi ko gham kisi ka hai

ba-unwan-e-digar sab ek hi afsana kahte hain

uTha degi unhen duniya kisi din apne hathon se

jo is mehman-sara mein KHud ko sahab-KHana kahte hain

nahin ehsas kuchh bhi apni mohsin-na-shanasi ka

chaman mein rah ke bhi sabza ko hum begana kahte hain

tasawwur ne badal di hai dil-e-barbaad ki surat

ye kaba tha magar ab hum ise but-KHana kahte hain

samai rakhne walon ka dahan wa ho nahin sakta

jo hain kam-zarf raaz-e-baada-o-paimana kahte hain

samajh sakta nahin koi zaban ahl-e-mohabbat ki

jise apna samajhte hain use begana kahte hain

nazar aata nahin duniya ka naqsha mo'atabar koi

use basti samajhte hain na hum virana kahte hain

ba-qadr-e-arzu koi yahan rahne nahin pata

ghalat kya hai jo duniya ko musafir-KHana kahte hain

patange hi ke sar sahra bandhe kyon sarfaroshi ka

jo apni jaan par khele use parwana kahte hain

aqidat se sar-e-momin jhuka hai sang-e-aswad par

isi ko ittihad-e-kaba-o-but-KHana kahte hain

nazar aata hai sarmasti ka aalam zarre zarre mein

isi nisbat se hum duniya ko ek mai-KHana kahte hain

'nazar' aur 'shad' ki ghazlon pe 'talib' ka ghazal kahna

wo jurat hai jise sab jurat-e-rindana kahte hain