isi liye bhi nae safar se bandhe hue hain

isī liye bhī na.e safar se bañdhe hue haiñ

ki ham parinde to bāl-o-par se bañdhe hue haiñ

tumheñ hī sahrā sambhālne kī paḌī huī hai

nikal ke ghar se bhī ham to ghar se bañdhe hue haiñ

kisī ne din meñ tamām chhāñv utaar lī hai

ye barg o gul to yūñhī shajar se bañdhe hue haiñ

yahāñ bhalā kaun apnī marzī se jī rahā hai

sabhī ishāre tirī nazar se bañdhe hue haiñ

sagān-e-kūcha-e-dilbarāñ kī misāl ham to

rihā bhī ho kar kisī ke dar se bañdhe hue haiñ

zamīn ḳhud ham ko khīñchtī phir rahī hai 'gauhar'

ajiib aalam meñ rahguzar se bañdhe hue haiñ

isi liye bhi nae safar se bandhe hue hain

ki hum parinde to baal-o-par se bandhe hue hain

tumhein hi sahra sambhaalne ki paDi hui hai

nikal ke ghar se bhi hum to ghar se bandhe hue hain

kisi ne din mein tamam chhanw utar li hai

ye barg o gul to yunhi shajar se bandhe hue hain

yahan bhala kaun apni marzi se ji raha hai

sabhi ishaare teri nazar se bandhe hue hain

sagan-e-kucha-e-dilbaran ki misal hum to

riha bhi ho kar kisi ke dar se bandhe hue hain

zamin KHud hum ko khinchti phir rahi hai 'gauhar'

ajib aalam mein rahguzar se bandhe hue hain