isi liye to khaDe hum buton ki saf mein hain

isī liye to khaḌe ham butoñ kī saf meñ haiñ

ḳhudā-parast bhī jab kāfiroñ kī saf meñ haiñ

haram ke paas banā.e ga.e haiñ maiḳhāne

ham aise rind bhī ab hājiyoñ kī saf meñ haiñ

hai kaisā vaqt ḳhudāyā suḳhan pe aayā huā

latīfa-go bhī ka.ī shā'iroñ kī saf meñ haiñ

kamān-dāroñ se kah do abhī na vaar kareñ

hamāre dost abhī dushmanoñ kī saf meñ haiñ

hamāre zaḳhm purāne udheḌne vaale

sunā hai aap to baḳhiya-garoñ kī saf meñ haiñ

ye kin dinoñ meñ haiñ nīlām hone vaale ham

khaḌe ġhulām bhī saudāgaroñ kī saf meñ haiñ

hamāre naam pe karte haiñ qatl aaj bhī log

shahīd ho ke bhī ham qātiloñ kī saf meñ haiñ

isi liye to khaDe hum buton ki saf mein hain

KHuda-parast bhi jab kafiron ki saf mein hain

haram ke pas banae gae hain maiKHane

hum aise rind bhi ab hajiyon ki saf mein hain

hai kaisa waqt KHudaya suKHan pe aaya hua

latifa-go bhi kai sha'iron ki saf mein hain

kaman-daron se kah do abhi na war karen

hamare dost abhi dushmanon ki saf mein hain

hamare zaKHm purane udheDne wale

suna hai aap to baKHiya-garon ki saf mein hain

ye kin dinon mein hain nilam hone wale hum

khaDe ghulam bhi saudagaron ki saf mein hain

hamare nam pe karte hain qatl aaj bhi log

shahid ho ke bhi hum qatilon ki saf mein hain