isi zamin pe isi aasman mein rahna hai

isī zamīñ pe isī āsmāñ meñ rahnā hai

tirā asiir huuñ tere jahāñ meñ rahnā hai

maiñ ek pal tirī duniyā meñ kyā qayām karūñ

ki umr bhar to mujhe raftagāñ meñ rahnā hai

meñ jāntā huuñ bahut saḳht dhuup hai lekin

safar meñ huuñ to saf-e-rah-ravāñ meñ rahnā hai

utar ga.ī hai to siine se mat nikāl use

ki mere ḳhuun ko terī sināñ meñ rahnā hai

na mere haath se chhuTnā hai mere neze ko

na tere tiir ko terī kamāñ meñ rahnā hai

khule raheñ jo khule haiñ qafas ke darvāze

vo kab chhuTeñge jinheñ qaid-e-jāñ meñ rahnā hai

to phir ye zindagi-e-jāvedāñ kā milnā kyā

jo har nafs nafs-e-rā.egāñ meñ rahnā hai

isi zamin pe isi aasman mein rahna hai

tera asir hun tere jahan mein rahna hai

main ek pal teri duniya mein kya qayam karun

ki umr bhar to mujhe raftagan mein rahna hai

mein jaanta hun bahut saKHt dhup hai lekin

safar mein hun to saf-e-rah-rawan mein rahna hai

utar gai hai to sine se mat nikal use

ki mere KHun ko teri sinan mein rahna hai

na mere hath se chhuTna hai mere neze ko

na tere tir ko teri kaman mein rahna hai

khule rahen jo khule hain qafas ke darwaze

wo kab chhuTenge jinhen qaid-e-jaan mein rahna hai

to phir ye zindagi-e-jawedan ka milna kya

jo har nafs nafs-e-raegan mein rahna hai